D’Ostküste vo Korea
Nach däm mir ufem Fischmärit in Sokcho (속초) kei Fisch hei gässe, simer ar Ostküste na witer uf Gangneung. Ufmerksame Läser vo üsne Gschichte wird dä Ort e Begriff sii — dert hei nämlech 2018 die Olympische und Paralympische Winterspiu stattgfunge und mir hei scho dervo verzeut: Paralympics.
Ds Militär - di Fründ und Häufer
In Gangneung si aber nid nume die Spiu gsi, sondern ar Küste gits ou e Art Chriegsmuseum (Tongil Park) wo es Chriegsschiff usem Koreachrieg und es gstrandets nordkoreanischs U-Boot ussteut. Das Museum ligt es Stück wit südlech ar Küste und mir hei e schöni Strandwanderig dert häre wöue ungernä. Blöderwiis sicheret Südkorea aber dr gsamt Küstebereich mit Stachudraht und höche Züün, so dass mir nach eire Stung kraxle i de Feuse wider hei chönne chehre. D’Küste isch nümm witer gange wiu dä Schiss-Zuun im Wäg isch gsi.
/i/r14Smpnt94.jpeg)
/i/Bk7HX63F9E.jpeg)
/i/H1fB7a2Y5N.jpeg)
Nach dere Enttüschig simer haut ar Strass na gloffe und hei derwile gstöpplet. Überraschenderwiis het e Offizier imne Minivan aaghaute und nis mitgno. Mit Häng u Füess heimer ihm erklärt dass mir zum Chriegsschiff wei. A däm het er rächt Fröid gha. Wo är bir Schranke am Iigang het aaghaute, het dr eint Wächter wöue cho Bigliet verchouffe und mir hei scho dr Gäudsecku zückt. Üse Fahrer het aber abgwunke und gfunge “Let me handle it”. Wo dr Wächter zur Schibe het ineghauset het dr Soudat nur so uf sini Uniform dütet, irgendöppis uf Koreanisch gseit und uf üs zeigt. Drufabe het dr Wächter d’Schranke göffnet und mir hei das Museum gratis chönne bsueche. Was für ne nätte Mönsch!
Dusse im Museum
Während ds Chriegsschiff und die dinne usgsteute Modäu vo Chriegsschiff usem Mittuauter eher schmau derhär chöme, isch d’Gschicht um ds U-Boot einiges spannender.
/i/HkeeLyaYq4.jpeg)
Am 15. Septämber 1996 het das U-Boot es drü Maa starchs Spionageteam ir Nöchi vo Gangneung abgsetzt. Ihri Mission isch gsi, die dertige Marineaktivitäte uszspioniere und wider hei z’ga. Wo die drü Spione aber zrugg ufs U-Boot hei wöue, isch das z’nach as Ufer gfahre und uf Grund gloffe. Ds Heck isch bi däm Manöver dermasse demoliert worde dass d’Mannschaft ihres Gfährt het müesse ufgä, aues sensitive Materiau vernichte und ufem Landwäg het müesse heiga. Zur Tarnig hei si Südkoreanischi Uniforme treit und sech i Gruppe ufteilt, aber es isch nid lang gange bis si ufgfloge si. D’Südkoreaner hei mobilisiert und e regurächti Hetzjagd verastautet. Tragischerwiis si derbii vier Südkoreanischi Ziviliste und zwöuf Soudate sowie 24 vo de 26 Invasore ums Läbe cho. Ei Nordkoreaner isch gfange gno worde, ei witere wird vermisst und hets wahrschiinlech über d’Gränze gschafft. Dä wo si hei gfange isch nach dr Befragig Instruktor ir Südkoreanische Armee worde. Ds U-Boot isch itze Teil vom Museum und me cha dri ine, muess aber e Heum aalege wius so munzig isch.
/i/HyrC_BTK5V.jpeg)
/i/r180dH6K94.jpeg)
/i/H1eX7U6tqV.jpeg)
/i/BkOAdBaK5V.jpeg)
/i/rJxIaIpYc4.jpeg)
Südwärts
Vo Gangneung simer per Outostopp uf Samcheok witer. Dert ischs aber am Strand chaut gsi und dr anti-nordkoreanisch Gränzschutz het sehr z’wünsche übrig gla, drum heimer so schnäu wie müglech wöue uf Busan cho.
/i/BJGewv6K5N.jpeg)
/i/BJWlPPTFqE.jpeg)
Am nächschte Tag heimer mit Outostöpple aber weniger Glück gha: obwou üs zwöimau öpper het mitgno, heimer am Schluss glich dr Bus uf Busan gno. Dr Erst het gmeint mir stöh am fautsche Ort und hetnis a ne grösseri Strass gsteut, dr Zwöit het gfunge, im Räge z’Stöpple sig doch nüt und hetnis zur Busstation gfahre. Je nu.