Geoje Ridgeline Trail

Womer nach dere fasch chli erzwungne Busfahrt si im Süde vo Korea, in Busan, aacho, het nis nid au zu viu ir Stadt ghaute. Es isch Früehlig worde — ändlech wider gnue warm für im Zäut z’schlafe.

Uf dr zwöitgrösste Insle vo Korea, Geoje (거제), grad südlech vo Busan, per Bus über ne Brügg erreichbar, het e Expat-Ami mau e Wanderig gmacht und gfunge die bruuch e Name. So isch dr Geoje Ridgeline Trail entstange. Dä füehrt vo Gohyeon (고현동), am Houptort vor Insle, ganz i Süde, zmitts über jede Hügu wo im Wäg isch.

Ds Wätter het guet wöue, so simer mit Zäut und (fasch) nur am Nötigste loszoge. Das si 17kg füre Phippu und 15kg für d’Steffi gsi — Verpflegig und je 2 Liter Wasser inklusive.

Gyeryongsan 계룡산

Dr erst Gipfu isch dr Husbärg vo Gohyeon. Dä geit schonigslos vo Meereshöchi grad mau 566 Meter bouzgredi ueche. Gäge Gipfu ischs feusig worde und die fixe Seili si e wiukommeni Chläter-Hiuf gsi. Grad aaseile het me sech aber nid müesse.

Vom Gipfu us het me dr Wäg gseh, wo no vor eim ligt. Ei Hoger nachem angere isch im liechte Smog verschwunde, wo d’Insle umschlosse het. D’Koreaner bhoupte dä Smog chöm vo China übere, China dementiert u seit dä sig iiheimisch produziert. Es hei äue beidi chli rächt.

Am Schwaanesee

Für Profi-Wanderer markiert dr Schwaanesee d’Heufti vom Wäg. Dä See beheimatet entgäge aune Erwartige keiner Schwän. Es isch derfür dr einzig Ort ufem Trail wo e chline Lade het, wo me cha Vorrät und Wasser ufstocke. Uf dr Krete obe isch Wasser leider Manguwar und die je zwe Liter si längstens trunke gsi, womer dr Shop gstürmt und 5 Liter Wasser gchouft hei — sehr zur Verwunderig vom Ladebsitzer.

Nachdäm dä Durst isch gstillt gsi, hets aafa chuele. E chli absitz vom Pfad simer ir Dunkuheit uf ne flache Bitz Ärde gstosse und hei z’erste Mau sit langem üses Zäut us dr Mongolei wider gsteut. Am Morge het sich dä Flach Bitz Ärde du aus verwiuderete Parkplatz zum ne Waudfriedhof usegsteut. Mir hoffe, keiner koreanische Ahne in Rage versetzt z’ha.

Nojasan 노자산

Am zwöite Tag, mit liechtem Zieh im Rügge, heimer aus ersts dr Wäg verlore. Bis itze ischs eifach gsi, ar Krete na z’louffe. Am Ändi vom Wäg womer druff si cho isch aber nur die stotzegi, bewaudeti Flanke vom Nojasan gstange. Da e Ridgeline Trail aber zwangswiis über d’Krete muess füehre, simer zueversichtlech gsi, dass we mir eifach bouzgredi dr Hoger uf louffe, dr Wäg irgendeinisch müesse chrüze.

Garasan 가라산

Die Logik het sech bestätiget. D’Hügle si am zwöite Tag definitiv gnädiger gsi aus am erste. Dr Wäg isch nie ganz uf Meereshöchi abe, u ir Ferni het me scho dr Garasan gseh — ds hüttige Tagesziel.

Uf däm Streckenabschnitt hets praktisch keiner Wanderer gha, so hett me ds Zäut grad näbem Wäg chönne steue. Wo plötzlech riesigi Schätte über ds Zäut ghuschet si, simer gleitig uf ne naheligende Usguck gchlätteret und hei no grad are Gruppe Adler chönne zueluege, wiesi hinger dr Bärgflanke verschwinde.

Mangsan 망산

Nach ere erholsame Nacht heimer die letschte Gimbab zum Zmorge gässe und heinis a Abstieg fasch wider uf Meereshöchi gmacht. Das isch chli ne deprimierende Start gsi, hetme doch ufem ganze Wäg z’dürab die vier oder füf Gipfle uf dr chline Haubinsle im Süde gseh, wos a däm Tag no het z’bestige gä.

Gäge Mittag simer are koreanische Wandergruppe verbiigloffe, wosech are länge Tafle zmitts im Waud es riese Festmau deckt het — mit viu Makgeolli und Soju, säubschtverständlech (me munklet die aukoholhaltige Riisgetränk sige dr wahr Grund, wieso Koreaner so gärn wandere).

Ungerwägs heimer angerne Wanderer zuegluegt, wie sie die früsch gsprossne, rosarote Blüete pflücke und snacke aus wäres Sauznüssli. Zersch heimer nis no gfragt “het die itze grad e Blüete gässe?”, speter heimer aber gseh dass das relativ viu Lüt mache und hei ou probiert. Es het auerdings weder viu Gschmack no Konsistänz.

Ufem Gipfu vom Mangsan, am letschte Gipfu wos ufem Geoje Ridgeline Trail ds bezwinge giut, heimer ir Mittagspouse no einisch die grosse Adler (oder doch Geier?) us dr Nöchi chönne betrachte, bevor mir üs a quälend letscht Abstieg zum Strand ir Bucht vo Jeogu-Ri (저구리) ufgmacht hei.

Am Strand und am Änd

Gäg die drü am Namitag am dritte Tag ischs gschafft gsi, mir si wider uf Meereshöchi unger gsi und hei e grosse Drang nacheme chüele Bier und Kimchi verspürt. Am nächste Tag heimer so lang usgschlafe, dass mir dr einzig Bus zrugg uf Gohyeon verpasst hei. Outostöpple isch aber hie überhoupt keis Problem und ire Haubstung (!) simer wider im Houptort vor Insle gsi.