Warschau - Moskau indirekt

Mir hei üs zum Ziel gsetzt, vo Bern bis Peking mitem Zug z’reise. Dass mir mit der Transsibirische übere gö, isch da rächt naheligend. Leider hei mir aber ar Reis vo Wien uf Moskau viu z’lang viu z’weni Beachtig gschänkt, so dass mir am Schluss no si i Stress cho mit Verbindige finge. Nach langem Hin und Her mit der Reiseagentur in Moskau und are nid bsetzte Gränze zwüsche Wiissrussland u Russland, hei mir du via Pole u Lettland dene Wiissrusse müesse uswiiche. Z’Visum für das Belarus für je 60 Stutz heimer haut scho im Pass gha. Isch aube schad aber jä nu.

Warschau

Völlig übermüedet si mir in Warschau aacho. Üses 6er Liegewage-Abteil isch natürlech voll gsi; die angere haub- bis ganz leer. Mir si emu aacho und hei aus erschts festgstellt, dassme in Pole mit Euro äue nid wit chunnt. Gömer haut ga Zloty und es Zmorge hole. Dusse hets gschiffet, Warschau isch üs chli grau vorcho.

Womer ändlech dr Bus i d’Altstadt gfunge hei, simer ga Zmittagässe. Natürlech traditionell und tüür, derfür bim Schloss - me gönntsech ja süsch nüt. Vilech chömemer de derfür e Tag ender hei. I dere Altstadt ischs de doch no chli farbiger worde, e ganzi Filmcrew het irgend e Schnulze dräit und d’Gasse verstopft, drum heimer relativ schnäu o wider gnue gha vo dere Altstadt und si ines Kafi plaaschtet und hei Lüt beobachtet.

Am Aabe 22:50 ischs de witer gange Richtig Riga (Lettland) über Vilnius (Litaue), dasmau mitem Bus. Es isch e ganz nöii Erfahrig gsi für üs, aber scho mau e ersti Vorbereitig uf d’Houzklass vor Transsibirische Iisebahn…

Riga

Womer am Morge am 05:00 bi gröschtem Schiff ar Panoramabushautesteu in Vilnius si usgstige, simer üs nid einig gsi öb dr Parkplatz mit in Reih und Glied parkierte Outos vore oder vilech doch eher z’chlotzige Iichoufszentrum hinger drann panoramaös isch. Nach witere chötzleche 5 Schtung Reis (inkl. 1 Schtung ufe Aaschluss warte), heimer z’Riga am Bahnhof afe eis e Duschi bruucht. Das het d’Läbesgeischter geweckt.

Nachem Spaziergang übere Märit mit früsche Steipiuze u Eierschwümm us dr Region, Plastikstoffblueme us China u vor Ort früsch abgsaagete Söichöpf hets bim Itauiener es feins Risotto ai funghi porcini gä. Z’berüehmte Schwarzhäupterhuus isch für Renovatione iipackt gsi, zum (P)Troscht heimer üs ir mittuauterleche Taverne es aaständigs Glas Honigbier iiverleibt.

17:30 geits witer uf Moskau, dasmau wider mitem Zug.