MOCKBA

Erwartet het üs aus Erschts e leere, sehr charakteristische Zugwage mit viel Houz. Mir hei ja schliesslech o Houzklass buechet. Bi däm Aablick hei mir üs öppe 50 Jahr ir Zit zrugg versetzt gfüeuht. I dere Klass gits 54 Bett pro Wage, immer vier uf dr einte u zwe uf dr angere Site vom Gang. Uf de Bilder si die ungere Bett längs ine Tisch verwandlet, die obere längs no ufeklappet. Die ungere quer si ou no ufeklappet, dassme cha Gepäck is Fach ungedrann tue. Das System isch üs veiechli durchdacht vorcho und vergliche mitem Zug vo Bern uf Wien hetme viu meh Platz gha - einersits für z’Lige aber ou für z’Gepäck.

Gränzübertritt

Für üs isch no aus nöi gsi i däm Zug. Mir hei du chli bi de routinierte Russe zuegluegt wosech verhaute hei aus würdesi nie öppis angers mache aus ir Transibirische Isebahn dür d’Wäut gondle: z’Tischli ines Bett umwandle, z’Bett schlafbereit mache, z’Gepäck am richtige Ort verstoue, bim berüehmte Samovar - e Boiler mit heissem Wasser, wo für aui gratis zur Verfüegig steit - Wasser fürnes Tee oder e Suppe hole…
Mir si mit Abstang die einzige Touriste i dem Wage gsi und si üs entsprächend exponiert vorcho. Mir si ou die Einzige gsi wo näbscht dr Passagierliste ou no zwe anger Fötzle hei müesse usfüue.

So am 10ni si mir de o mau ga lige, die angere Passagiere hei aber kener Aastaute gmacht wöue z’Gliger fürezschriisse. E Haubschtung speter het dr Zug zmitts im Scheiss ghaute und dr Zugbegleiter isch düreghüsteret und het üs z’verstah gä, dassmer söue üser Päss u Iireisedokumänt vorbereite. D’Steffi het natürlech scho gschlafe wo du ds russische Gränzwachkorps die verchlemmtischti Kontrolleurin het verbigschickt womesech nume cha vorsteue. Nidemau im Bilderbuech chönntme öpper mit somne Stock im Arsch zeichne. Nach 5 Minute zwüsche Passfoto und verschlafnigem Gsicht hin u här luege het si üs abgchouft dass mir würk die si, wo mir vorgä z’sii. No mau Schwein gha dänkemer und gö wider ga lige. Es isch üs scho chli gspässig vorcho, dass wider niemmer angers isch ga lige, aber was söus.

E Stung speter het dr Zug du wider ghaute und die zwöiti Rundi versteinereti Gsichter isch vor üsem Bett gstange. Dasmau mit Taschelampe und Militäreskorte. Itz ischsnis du scho afe nümm ganz so wou gsi, vor auem wosi hei wöue dr Rucksack luege wo mir ungerem ungere Bett verstout hei gha. Da ischnis du o taget wieso die unge drann no nid si ga lige. D Routiniers haut. Dr Zug isch ou no vo usse abgsuecht worde, aber derna isch du Rueh iigchert, ds Liecht isch us und mir si in Russland gsi.

Leider hei mir üs nid trout es Föteli z’mache wüu mir Angst vor de russische Gfängnis hei gha, drum hie es exemplarischs Bild

Fahrt uf Moskau

Z’sibirische Grosi vo üsem Abteu, d’Tatjana, isch zersch in Sorg gsi, dassmer nüt z’Ässe derbi hei u womer hei gässe hetsisech Sorge um üsi Sicherheit in Moskau gmacht. Da sie nid het Änglisch chönne het d’Svjeta, wo ou no i üsem Abteil isch gsi, übersetzt. Sie het üs Tipps gä wie mir üser Handtäschli ir U-Bahn söue ume Chopf aalege, wie mir ds Gäud imne Täschli am Körper söue trage und dass mir üs nid a überfüute Plätz söue ufhaute. Wo si üse usserordentlech Muet zum xte Mau grüehmt het, isch üs scho afe bau chli Angscht u Bang worde. Wie söue mir das Moskau nume überläbe?

Moskau

Am Bahnhof het üs zu üsem guete Glück d’Olga abghout. Bi ihre hei mir ei Nacht Ungerschlupf gfunge und si het üs iri Stadt zeigt. Mir hei gwüsst dass mir in Russland si, wo mir ufem Husdach gägenüber zwe Type bim Füüre gseh hei. D’Olga het du gmeint das sige Vorbereitige füre Winter, mir si aber sicher dass Russland eifach so isch.

Dank üsem Umwäg über Lettland anstatt dür Wiisrussland hei mir e Tag in Moskau verlore, die bekanntischte Sehenswürdigkeite hei mir aber trotzdem abklapperet und tapfer am Räge trotzt.

Mir gloube die riise Stadt hätt üs glii einisch dr Räst gä, hätte mir kei Guide gha. Me seit in Moskau wohne um di … ehm niemmer weiss gloub so gnau wie viu Lüt in Moskau wohne. Sicher meh aus 10 Millione aber äue weniger aus 20 Millione, schiins gits viu illegali Immigration.

Nach dene tolle Erfahrige im Zug hei mir üs uf die erste 27 Stung vor Transsibirische Isebahn gfröit. Nächschte Haut: Yekaterinburg.