Shanghai

Üse Proviantsack im Zug isch so riesig gsi, dass ar Steffi ihre Sitznachbar nis ärnschthaft druf hiigwise het, dasses in Shanghai (上海) ou z’Ässe gubi — mir müesse nid aues vo Chengdu mitnä. Mir heinis fasch nid derfür gha, nim z’säge dass das würklech nume üse Proviant für die 13 Stung Zugfahrt quer dür China isch, är het nämlech nume eis chlises Sandwich derbii gha.

Di Zugfahrt het üs nomau verdütlechet, wie riesig China isch: 13 Stung mit 300 km/h!

13 Stung; 300 km/h

Am Tag

Die meistbevöukerti Stadt in China, 24 millione Lüt. Eigentlech nid e Ort wos üs normalerwiis härezieht. Aber mir si ufem Wäg i Norde vo China gsi und die bessere Zugverbindige si aui usbuechet gsi drum heimernis gseit: wieso nid. Mir si mit gmischte Gfüeu aacho und Shanghai hetnis dämentsprächend empfange. Mir hei e riese Abstigi buechet wo die düstere Gäng nach Zigarette gstunke hei, ds Bettzüg fragwürdegi Fläcke ufgwiese het und d’Lüt eim ir Lobby mit fiischtere Blicke taxiert hei. We me sech ir Ungerkunft nid wou füeut, isch outomatisch ou dr Ort blöd.

Über dr Stadt isch e dicki Smog-Glogge ghanget wo eim ds Sight-Seeing einigermasse verdorbe het. D’Ussicht vor berüehmte Promenade “The Bund” us richtig Finanzviertu het eim ou grad e Erklärig gliferet, vo wo dr Smog chunnt. Eine ume Anger si d’Cholefrachter die bruuni Brüehi z’düruf bloderet und hei derbii säuber scho ne grosse Teil zur Verschmutzig biitreit.

D’Wanderig am Fluss na ufwärts het üses Biud vo dere Stadt nid vermöge ds beschönige, het aber d’Perspektive ufs Finanzviertu veränderet und enthüllt wie munzig dä Chugeli-Turm isch.

Ir Nacht

Dr Nachtspaziergang het üs scho besser gfaue, je meh me trunke het, je dunkler dasses isch…

I de Gasse

E witere Spaziergang dür d’Gasse vo Shanghai het nume no meh Misstäng as Tagesliecht gförderet. Zum Bispiu het Shanghai e massive Wöschständer-Mangu. D’Lag isch würklech prekär und mir si schockiert gsi, wie die Tragödie vor Regierig und vo Medie, ou grad de westleche Sänder, totgschwige wird. Spändet itze Wöschständer für Shanghai!

Ir Autstadt

Mir heinis scho gfragt wo au die 24 millione Lüt eigentlech so aui si. Ir Autstadt heimerse du gfunge. Si si aui ufere Brügg gsi wo überne künstlech aagleite Teich füehrt und hei die wahnsinnig kitschige Kunstinstallatione bestuunt.

Bim J. K.

In Fenghuang het üs dr J. K. gulfe es Menu ds übersetze. Drufabe simer mit ihm chli go wandere und go Znacht ässe. Wo mir i Südweste witerzoge si, isch är hei uf Suzhou (苏州), ca. 100 Kilometer westlech vo Shanghai. Itze, wo mir dr Wäg uf Shanghai ou gfunge hei, heimer die Glägeheit gnutzt und si mitem Hochgschwindigkeitszug hurti uf ne Hotpot übere i d’Nachbarstadt düset. Mir hei bim J. K. daheime mit zwe Kollege vo ihm und amne Schäftli vou Riisschnaps vo sine Eutere e völlig vernünftige und erwachsne Aabe verbracht.