— 26.09.2017 —

Ir Isebahn

De wärme itz äbe nachere Wuche i däm ferne Moskau und när wirsch ufem Perron uf Schwizerdütsch aaquatscht. Vo dene über 20 Wäge si doch die Schwizer genau i üsem Wage - natürlech o grad im Abteil vis-à-vis. Es si dr Pesche und ds Käthi* usem Eggiwiu gsi. Die beide si mit üs bis uf Yekaterinburg gfahre. Me het gueti Gspräch gfüehrt und im Spiiswage es Bierli zwöi tütscht.

alt text
Si si üs grad uf Ahieb sympatisch gsi

Was macht me aus so, weme 27 Stung ir Isebahn isch? Da gits näbscht useluege u Tee trinke no fougendes:

  • Vodka trinke

  • Aber nid mau Vodka verma die Lääri z’vertribe

alt text
alt text
alt text
alt text
Drum hei mir angeri tolli Aktivitäte gfunge (Dimi, es het kei einzige Mönsch i dem Zug Charte gspiut)

Me isch aber nid ununterbroche im Zug. I teune Orte hautet dr Zug e chli lenger und me het Zit, sech chli d’Bei z’vertrample. Ufem Perron verchoufe es paar Froueli Beeri u tröchneti Fische. Es wärde aber o Chronlüüchter, riisegi Vasene und Steiguet-Obstschale ghandlet. Aus totau nützlechi Sache imne Wage mit 50 angere Lüt. Womer de witer i Oste si cho - churz vor Sibirie - hets ou Fäumütze und -mäntle z’choufe gä.

Bi dene lengere Stopps isch aube d’Loki ustuscht worde, mir näh aa, dassi denn e Voutankti parat hei gha. Topmotivierti Fahrwärksingenieure hei d’Qualität vor Radufhänkig mit modernste Mittel kontrolliert - mit grosse Isestangene heisi dragchlopfet und glost obs tönt oder nid. Ir Nechi vom Ural isch üs ds russische Schwarze Gold begägnet.

alt text
alt text
alt text
alt text
Das isch o dr erst schön Tag uf üser Reis gsi

Heisses Wasser isch e Religion

Überau wo mir in Russland häre chöme steit heisses Wasser zur Verfüegig. Ou im Zug ghört heisses Wasser zum Inventar. I jedem Wage hets e Samovar, wo rege gnutzt wird. Im Zug wird sehr viu Tee trunke, Instant-Noodles si höch im Kurs aber o Néscafe-Miuchkafi-Pulver het jede derbii (me chas ou choufe weme mit fragendem Blick ‘Néscafe?’ zur Kondukteuse seit). Im Zug ischs eich säute chaut gsi, bi de Stopps si mir üs aube use chli ga abchüehle, aber die heisse Sache si glich geng guet gsi. Es isch usserdäm sehr klug, gnue Verpflegig i Zug mitznäh, we 50 Lüt um eim ume Ässe bechunntme outomatisch Hunger.

alt text
Nid so schmuckvoll wie ig mir das ha vorgsteut, heizt aber wie ne More

Wi die beide Zwüschestopps Yekaterinburg und Krasnoyarsk si gsi, erfahret dir ir nächschte Gschicht.

* Name und Herkunft aus Datenschutzgründen von der Red. geändert, Abb. anonymisiert