Listvyanka

Zur Feier der 28 Lenzen heisech di wärte Dame- u Herrschafte nomau uf a z’grosse Wasser gmacht. No bevorme im öffentliche Bös ghocket isch, hetme scho dr Fahrer vertöibt gha. Aber ganz u gar nid mit Absicht sondern usem schlichte und eifache Grund wüume dr russische Sprach zweni bewandt isch gsi füre Fahrpriis chönne z’verstah. Me isch du churzerhand uf die zwe Sitze näbem Fahrer beorderet worde u de isches o scho losgange. E schier endlosi Strass zmitts düre herbschtlech gfärbt Birke-Lärche-Waud vor sibirische Taiga. D’Fahrt isch so vernünftig u aaständig vostatte gange, hätter nid di typischi Nationaltracht (e Trainer) treit, hättme nümm gloubt de Fahrer sig russischer Herkunft.

Dr erst Iidruck vo Listvyanka isch haarströibend gsi. Die Kreature wo am Wägesrand entlang zur Schou gsteut si gsi, si so schlächt usgstopft gsi dasses eim tschuderet het. Es hätt no kunststückuffüehrendi Baikalrobbe im Aquarium u Wöuf u Bäre i Hundezwinger im Zoo z’fötele gä, aber da hetme du bewusst druf verzichtet.

Würd Listvyanka nid am Ufer vom Baikalsee lige u hätts keni Blüemli gha, hätt eim dr erscht Iidruck vo dem Ort grad wider zrügg uf Irkutsk verjagt. Guet gits immer ono e zwöite Iidruck.

Fischmarkt

Ufem lokale Markt isch vorrangig dr Baikalfisch, Omul, i aune Forme u Farbe feil botte worde — gröicheret, frittiert, tröchnet, am Stück, filetiert, warm, chaut und sogar roh. Fürs Feschtmahl hetmesech du für di gröichereti, warmi Variante entschide.

Miis Schätzliii

blubb

Füsse hoch

Im behagliche, vermuetlech rosshaarisolierte Gästehuus mit knarzende Houzdiele hei di Herrschafte du no paar Chörndli pickt und e schlechte Tropfe trunke u drna ganz nam Motto vom Gastgeber “gschlafe wi Bebeli”.