Bim grosse Khan

Gäge Ändi September isch üses Russland Visum usgloffe und es isch Zit worde zum witerreise. Mir heinis sehr uf di Witerfahrt am Baikalsee entlang über Slyudyanka und Ulan-Ude gfröit; es söu e sehr schöni Strecki sii. Schiins geit ds Glöis diräkt am See entlang. D’Fröid het aber nid lang aaghaute womer gseh hei wenn dass üse Zug abfahrt.

So simer ou bi dem Ulan-Ude, wosi dr grösst Chopf vom Lenin hei (ja u de?), zmitts ir Nacht düregfahre. Am nächschte Tag simer du när mau a d’Gränze cho. Bir Abfahrt in Irkutsk heimer veiechli Wäge derbii gha, womer aber i dem chliine Gränzort si aacho isch nur no ei einzige Wage übrig gsi. I dem Ort heimer müesse usstige und nis vier Schtung lang angerwitig vertörle. Dr Wage heisi irgendwo häre wäggfüehrt. Mir gö dervo us dassi hei müesse ds Fahrgsteu uf die mongolischi Spurwiti umsattle, si aber gliich chli irritiert gsi wo de Wage mit üsem Gepäck eifach so dervotuckeret isch. Nachem Iistige hets e Gepäckkontrolle gä: ‘In his backpack are the same things than in yours? That’s okey then.’, het d’Kontrolleuse d’Steffi gfragt.

Ar mongolische Gränze simer vomne Kommitee salutierende Soudate empfange worde. Bim Aablick vo üsere Zugkomposition hei si sich müesse aastränge, d’Fassig z’bewahre. Dr eint oder anger het scho chli unger dr Schirmmütze füre pruschtet. Z’Gepäck isch no einisch kontrolliert worde, Frage si aber keiner gsteut worde und mir si ir Mongolei gsi.

Zahle u Fakte zum Land vom blaue Himu

• E Jurte wird Ger gnennt und die farbige Mäntle nenntme Deel
• Es git 3 Millione Mongole und 60 Millione Geisse, Schaf, Ross u Kameu
• D’Heufti vo aune Mongole läbt i eire Stadt - Ulan Bator (Rote Heud)
• Ulan Bator het enormi Problem mit dr Luftverschmutzig, obwou fasch jede e Prius fahrt
• Outos hei Vortritt, i jeder Situation
• Fleisch isch Houptgricht und Biilag, Gmües isch Dekoration und was isch Salat?
• Jedes Outo isch ou es Taxi
• Wieso es Huus boue weme imne Ger cha wohne
• Bimne Ger wird nid aagchlopfet und me bechunnt sofort Milchtee
• D’Mongole si sehr gastfründlech, ihri Hüng gar nid
• Ds Veh isch frei, d’Hüser si aui iizuunet
• Aus schmöckt e chli nach Schaf
• Schaffähli chame a jedem Egge chouffe und choste 2.50 z’Stück
• E Familie mit zwöi chline Meitli isst im Winter es Guschti, e Geiss und zwöi Schaf mit Hut u Haar
• Jede u si Unggle organisiert Exkursione und het es Guesthouse
• Dr Chinggis Khan isch überau und wird fasch wine Gott verehrt, obwou die meischte Mongole Buddhischte (tibetisch) si
• D’Mongolei schribt kyrillisch, d’Übersetzige si aber sehr ungerschiedlech. Us “Мөрөн” cha zum Bispiu Moron, Mörön aber ou Murun wärde. Es isch praktisch unmüglech d’Ussprach richtig z’träffe
• Es Ger isch ire Stung uf- und abbout weme z’viert isch und wird mit chline Brügiwäge transportiert
• Ir Mongolei gits Horse Force (certified for humans) statt Tiger Balm
• Nomade zieh ir Regu vier mau im Jahr witer, meischtens zu de gliche Plätz
• Meitli wei id Stadt zieh, Giele wei Nomade wärde wie ihrer Väter
• Im Nationalpark isch jage verbote, ussert Wöuf, die si zum Abschuss freigä
• D’Strasse si horribu (wes het)
• Fuessgängerample: rot=du wirsch überfahre, grüen=du darfsch loufe wedi trousch
• Dr Himu isch so blau wiesi säge

Ulan Bator

Die Stadt het üs chli überforderet womer am sächsi am Morge si aacho. Dr Sunneufgang isch zwar wunderschön gsi, aber d’Cheuti isch diräkt id Chnoche gfahre. Im Bahnhofsgebäude heimeris zersch chli gsammlet, e Million Tugrik (400 Franke) useglah. Das isch veiechli e Biige Gäud wiu die grössti Note isch 20’000 Tugrik (8 Franke). Zersch heimer wöue e Bus zum Hostel nä, aber das System isch so undurchsichtig und wirr, dass mir lieber gloffe si und ersti Iidrück vor Stadt hei chönne sammle. Aus Fuessgänger ischme aber am ungere Ändi vor Nahrigschötti und bechunnt das ou z’Gspüre und z’Ghöre. Weme im Wäg steit wirdme sofort dervoghuupet.

D’Stadt säuber het im Chärn es paar höchi Hotels, witer usse grösseri Wohnblöck, viu dervo no im Bou. D’Ussebezirke wärde Ger-Distrikte gnennt und erstreckesech über z’ganze Tal uf au Site use. Dert wohne die ärmere Schichte und trage mit ihrne Choleöfe zume Grossteil vor Luftverschmutzig bii.

Schwarzmarkt (Naran Tuul)

Eini vo de Houptattraktione in UB, wie die Stadt vo de meiste Änglisch-Sprächende gnennt wird. Es isch nid verbote dert iizchoufe, aber d’Wahrschinlechkeit, gfäuschti War z’choufe, isch veiechli höch. Me geit aber ou vorauem dert häre für die Vielfalt a darbotne Güeter z’erläbe. Es git dert Büsis, Zahnbürstli, Teppiche, Schueh, Tee, Velos, Wöschpulver, Solarpanels, Täfeli, mongolischi Holzsättle u Kamelwollesocke. Imne düstere Egge vom Märit si ou Adlerchöpf, Wolfsfähli und sogar e chlini Hitler Statue zum Verchouf gstange. Dert isch fötele verbote gsi.

Z’Russland heimer vomne Israeli viu gueti Tipps für Toure becho. Da ja jede Toure organisiert hei mir üs churz nach dr Aakunft scho is erste Aabentür gstürzt.