Hert ar Gränze

Ds Jahr neigt sech am Ändi zue. Gneuer gseit, ds Chinesische Jahr 2017 wo im westleche Jahr 2018 am 15. Februar ufhört. Wär a dere Steu mit de Jahrzahle es Gnusch het becho, hütt isch dr und die Gschicht handlet vomne Ereignis wo Täg här isch. Einewäg, für däm Fest usem Wäg z’ga, was üs vo diversne Iiheimische und Reisende empfohle isch worde, hei mir üs ganz i Nordoste vo China uf Dandong (丹东) verzoge.

Das isch us mehrerne Gründ praktisch gsi:

1. Dandong ligt am Yalu River, am Gränzfluss zwüsche China und Nordkorea; mir hei scho geng mau wöue überespienzle
2. Dandong isch e chliini Stadt mit nume knapp are Millione Iiwohner am üsserste Rand vo China, wit wäg vo aune Grossstädt; hie simer bestimmt sicher vorem Nöijahrsirrsinn
3. Vo Dandong us fahrt eini vo de wenige Fährine uf Südkorea; meh zu dere speter

E Brügg für d’Fründschaft

Wo üse Zug im Houptbahnhof vo Dandong iifahrt, ischs verusse scho fiischter. Ds Hostel, wo mir üs über die turbulenti Zit wärde drinne verbunkere, isch schön am Fluss gläge und statt es Taxi z’näh, schländeremer am Fluss entlang dür d’Nacht am Hostel entgäge. Uf üsem Wäg chömemer ar schön belüchtete Brügg verbii, wo uf Nordkorea über füehrt. Z’erschte womer mache, isch das Föteli:

Aus zwöits läsemer ds grosse blaue Schiud wo füf Meter witer ar Promenade aabracht isch:

Mir si auso keiner 10 Minute ar Gränze zu Nordkorea und hei bereits Spionage betribe. Das faht ja grandios ah. Wüus isch fiischter gsi, hetnis aber zum Glück niemmer gseh — wüu wes fiischter isch gseht me nüt. Mir si unbescholte im Hostel aacho und hei es Upgrade is Familiezimmer übercho; es warms Zimmer, es riesigs Bett, es Fäischter mit Fluss- und Nordkorea-Sicht und Platz zum versoue. Anähmlechkeite wome so richtig lehrt schetze.

Wonis d’Sunne am Morge a Chopf (d’Steffi het ja wöue Gring schribe) gschune het, heimer zum Fäischter us gluegt und üsne Ouge nid trout: d’Iischscholle ufem Fluss si flussufwärts tribe. Mir hei sofort Atomwaffetests vom Kim d’Schuld gä und si froh gsi, isch das Mysterium so schnäu klärt gsi. So heimer meh Zit gha, die beide Brügge go z’besichtige. Die rächti isch vo 1911, die linggi vo 1943 (vo de Japaner während dr Bsatzig bout). Im Korea Chrieg (China und Nordkorea gäge Amerika und Südkorea; Kommunismus gäge Kapitalismus) vo 1950 si beidi Brügge heftig bombardiert worde. Nachem Ändi vom Chrieg isch nur die linggi, grösseri Brügg repariert worde.

Die rächti Brügg dient aus Chriegsrelikt und Mahnmau vor amerikanische Aggression. Dr koreanisch Teil isch zruggbout worde, wägem Stahl. Ufem Chinesische Teil chame, für nes chlises Iitrittsgäud, bis ganz a Spitz füre und cha vo no nöcher uf Nordkorea übereluege. Vore uf dr Brügg gits ganz viu interessanti Sache z’gseh:

Es chliises Rieserad, wo grad niemer druff isch gsi

E Wasserrutschbahn, wo ou grad niemmer isch druff gsi

Ächti Nordkoreaner

E Tanker wo grad niemmer bruucht

Fischer

E Fabrik wo grad niemmer bruucht

Iischbärge wo grad weder flussuf- no abwärts tribe

Fötele verbiete aber när Münzfernrohr installiere? Classic China

D’Brügg säuber isch veiechli mitgnoh.

Chli ga spienzle

Vor Brügg us gsehtme ja scho Einiges, nördlech vo Dandong steit aber no es Stück vor Grosse Muur vo China. Das isch zwar nümm mitem Räst vor Muur verbunge, steit aber diräkt ar Gränze und füehrt bouzgredi über ne Hoger und z’oberst hets e Wachturm. Dä eignetsech perfekt für übere z’glüüsle. Dr gfrornig Gränzfluss isch hie viu schmeler, äne hets vor auem Buurehöf und Hügle.

Weme e Spionagekamera bsitzt, chame ou chli härezoome und gseht z.B. d’Wachablösig.

Über ne bsungers stotzigi Stäge chame hinger dr Hügu z’dürab zum Fluss abe chlättere. Dert trenne die beide Länder nur no knapp 10 Meter und zwe verrosteti Stachudraht-Züün.

Ds Schiudli, wo druffe steit wasme aus nid sött, heimer natürlech ersch wider am Schluss gseh.

Ds Chinesische Nöijahr

Weme so dür d’Strasse vo Dandong gschländeret isch, hetme d’Euphorie richtig chönne griife. Die ganzi Stadt het sich useputzt und vor rot-guldige Site zeigt. D’Türe vo jedem Gschäft, jedem Huus, jedes Garagetor und vorauem die öffentleche Gebäude si mit rote Banner gschmückt gsi. Uf de Banner stö Wünsch für ds Nöie Jahr oder Früehligsgedicht. Roti Latärne wärde ufghänkt — die söue schiins Unglück vertribe. Ir Mitti hanget mängisch, uf eme rote diamantförmige Papier, ds Chinesische Zeiche für Glück (福, fu).

D’Houptsach a dem Fescht isch aber ds Füürwärch. Womer uf dr Strass hei probiert Knaukörper ds erstah, simer vom übers ganze Gsicht strahlende, vermeintleche Verchöiffer drüber informiert worde, dass das sis eigete Füürwärch sig. Är sig drum im Jahr vom Hung gebore und ds kommende Jahr isch grad äbe ou es Hundejahr. Drum heig är sich so viu Füürwärch gchouft wiener het vermöge, für dasser i “sim” Jahr müglechscht viu Glück het. Är het um die 300 Franke für dä Bärg Spass usgä.

Am Aabe ischs de ou so richtig abgange, vorauem uf dr Dandong Site vom Fluss. Nordkorea het zwar mit ere schüüche Ragete hie und da ou mitgfiiret, isch aber mehrheitlech schwarz gsi. Vo däm Event heimer leider keiner Biuder, wüu mir vom Hostelbetriber zumne traditionell chinesische Festschmaus si iiglade worde. Mit emne Chines, wo uf Nordkorea het wöue wüuer aui gfährleche Länder wott bsueche, amne untröstleche Ami, wo eigentlech e Flug uf Dali (im gägenüberligende Egge vo China) het wöue bueche und stattdesse uf Dandong isch gfloge und are sehr schüüche dütsche Bouingenieurin hei mir Dumplings, diversi unidentifizierbari Gmüesgricht, Roulade us Schweinefett (nur Schweinefett) und assortierti Stückli vom Huehn (inklusive Füess) gnosse und drzue gmüetlech ar Wermi d’Nöijahrs Sändig im Fernseh gluegt.