China

Nach 104 (u bereits witere 26) Täg China wirds Zit, mau es paar Sache über das Land klarzsteue. Bevor mir si uf China cho, hei mir diversi Vorstellige und Vorurteil über das riesige Land gha. Es paar vo dene hei sich nid bewarheitet — angeri scho.

12 Vorurteil u Fakte wiu Ufzählige rocke

1. Chinese chöi kei ‘R’ säge

Ganz im Gägesatz zu üsne Vorstellige, im Chinesische gubs keiner ‘R’s, gits ganz viu. Zum Bispiu z’Wort für zwöi, ‘er’ (二), oder in ‘Harbin’ (哈爾濱). Dr ‘R’ wird aber nid wie bi üs grollt, sondern wie im Änglische usgsproche. A däm Vorurteil isch aber trotzdem öppis drann: wo mir bire Znachtrundi üsne neue Fründe hei wöue ‘Prost!’ biibringe, isch prompt es ‘Plost!’ usecho. Ändlech hei mir mau amne Chines chönne d’Ussprach korrigiere.

2. Smog überau

Leider kei herbstleche Wasserdunst in Chengdu

Weme a China dänkt, chöme eim d’Begriffe Smog oder Luftverschmutzig rächt schnäu i Sinn. Das beschmudlet ds empfindleche Image vom Riich vor Mitti, drum hetme sofort Symptombekämpfig im grosse Styl betribe. Grossi Teile vor, uf Choleverbrönnig basierende, Stromproduktion si i Weste vo China verleit worde — dert wos keiner Touriste und Kritiker het. Für Peking het das afe rächt guet funktioniert, für angeri Gebiet wie Chengdu oder Shanghai het das no ke Effekt zeigt. Ds Wätter isch auso meischtens grau in bruun i dene Städt. Me muess aber ou säge, dass mir im Winter si ungerwägs gsi und viu Lüt no eigeti Chole-Öfe hei. Im Summer gsehts vilech e chli besser us.

3. Me treit e Mundschutz wägem Smog

Es git tatsächlech dr eint oder anger Chines wo mitem Mundschutz umeloufft. Dr Houptgrund isch aber nid dr Smog, wiu säubscht in Gebiet wo dä stockdick ir Luft ghanget isch, het d’Mehrheit keine treit. Us de zahlriiche Sicherheits-Hiiwise wo ir U-Bahn de Chinese ds Läbe erkläre, hei mir chönne useläse, dasses empfohle isch, e Mundschutz z’trage weme chrank isch damit me siner Mitmönsche nid aasteckt.

4. Ei-Chinder Politik

Während das Gsetz 1970 isch iigfüehrt worde, hets nid für aui gulte. Bure hei zum Bispiu zwöi Chinder dörfe ha, während Lüt ir Stadt uf eis begränzt si gsi. Vor drüne Jahr (2016) isch das Gsetz wider glockeret worde. Einersits wiu d’Bevöukerig z’aut isch worde und die Junge mit dr Finanzierig vor Ränte nümm nache möge u angerersits wius viu Abtribige vo Meitli het gä — in China müesse sech d’Giele um d’Eutere kümmere und si so quasi e Autersvorsorg.

Trotzdem hei mir mehreri Chinese troffe, wo Gschwüschterti hei gha. I eim Fau sogar drü. D’Mueter het aber ihrer Ching bi Verwandte platziert und isch säuber ständig uf dr Flucht vor dr heftige Gäudstraf gsi, wo eim blüeht weme d’Regle verletzt.

Aktuell herrscht in China iz e 2-Chinder-Politik, es heisst aber, dass di Beschränkig müglecherwiis de no ganz ufglöst wird.

5. Respäktlosigkeit ar Natur gägenüber

Was eim am meischte z’Dänke git in China, isch wie d’Mönsche mit dr Natur und Tier umgö.

Viu z’oft gseht me öpper e Snack uspacke und ds Plastik irgendwo häre schiesse. I chlinere Strasserestaurants wird dr Ghüder, Nastüechli, die völlig irrsinnigi Plastikverpackig vom Gschirr und de Stäbli, Chnoche und angers eifach a Bode gschosse bises usgseht wie ufere Müllhaude. Schiuder wo “No littering” druff steit, wärde vor breite Bevöukerig grosszügig ignoriert. Strassegräbe und i abglägnigere Gebiet ou Flüss si mit Abfau gspickt. Ir Stadt gits im Vergliich zu angerne asiatische Länder ganzi Armee vo Putzpersonal wo d’Plastikfluet chli iidämme. We eim aber bständig öpper dr Dräck hingernache zämelist, lehrt me nie die paar Meter zum Ghüder z’louffe. Recycling isch a de meiste Orte äbefaus no nid vorhande oder e Alibiüebig. Weme e Grüentonne het und d’Lüt ihri organische Abfäu im Plastiksack entsorge nützts eifach o nid viu.

Bruuchts ame Ort zur bestehende Strass no e Schnäustrass, wird die diskussions- und schonigslos bout, egau wi viu Waud oder angeri Läbesrüüm das müesse wiiche drfür. Fauses im Tau ke Platz me het, wird churzerhand e Strassebrügg bout - massivschti Betonpfiler, entlang vo bewachsne Hügle u dür z’Tau, egau wi schön das Tau ohni hätt usgseh. Verlouft e Strass ame Abhang na, hets entweder Steischlagnetz - lückelos und sowit me cha gseh - oder z’Port wird churzerhand komplett iibetoniert für d’Strass vor Erdrütsch und Steischlag z’schütze. Mir si überzoge, dass o bim Bou vome nöie Stoudamm nidemau e Sekunde lang a d’Natur dänkt wird, wos müglecherwiis zerstört. Wobii me da fairerwiis muess säge, dasses in China nid e schlechti Sach isch, Stoudämm z’ha, wes drfür schlussendlich weniger Chohle bruucht.

Im Umgang mit Tier hei mir so viu härzzerrissends erläbt, dass mir nid aus wei ufschribe. Grad in touristische Orte wärde oft Tier aus Gäudmaschine missbrucht. Ds Wohlergehe vo dene Tier, sige das Hüng, Ross, Schneefüchs oder angeri, isch völlig näbesächlech, es isch einzig und elei es Mittu mitem Zwäck Gäud z’verdiene. Wes nümm funktioniert wirds ustuscht.

Es Schiud ir Giant Panda Breeding Base in Chengdu. E Studie schetzt, dass ds Konserviere vo Pandas China 2.7 bis 6.9 Milliarde US-Dollar pro Jahr iibringt

Die Grösse und der moralische Fortschritt einer Nation kann daran gemessen werden, wie sie ihre Tiere behandelt. Mahatma Gandhi

6. Aastang

Die hiesige Maniere isch eine vo de Ungerschide wo eim am schnäuschte uffaut. Wiu ds Schlücke vo Spucke ir Traditionelle Chinesische Medizin aus ungsung aagluegt wird, chodere Chinese gärn und lut. I teune Busse hets Spucknäpf, i moderne Züg oder U-Bahn Statione isch ds a Bode Chodere aber ungerseit. I eutere Züg, Busse und fasch aune Restaurants wird groucht und pratkisch jede Chines isch e Roucher — Froue hingäge gsehtme üsserst säute mitere Zigi.

Für Lüt mitere Neigig zu Misophonie, isch e ässende Chines die nünti Äbeni vo Dantes Höu. Im Spezielle we eini vo de beliebte Nudelboxe (chame mit heissem Wasser aarüere) verschlunge wird. Am Aafang si die Nudle viu z’heiss und müesse blase wärde. Denn wärdesi gnüsslech inegschlürft und tüchtig mit offetem Muu gchätschet. Derbii isch dr Chopf quasi ir Box inne, was natürlech düre Dampf und dank de scharfe Gwürz d’Nase zum louffe bringt. Wius unanständig isch, die ds schnütze, wird zwüschem Schlürfe u Schmatze no chräftig Gschnürflet. Gottseidank gits schliessendi Chopfhörer und luti Musig.

Nach Ferie in China hetme unweigerlech e Neigig zu Misophonie

7. China isch vor Ussewäut abgschottet

Usländischi Internetsite si zwar mehrheitlech blockiert (kei Youtube, Facebook, WhatsApp, Google und ou kei bisnär.ch), mit sogenannte VPNs chame die Blockade aber umgah (so eine heimer brucht für dä Blog z’schribe). China isch es Exportland und unzähligi Gschäft si abhängig vore guete Verbindig zu usländische Chunde. Drum hei Gschäftslüt und vieli jüngeri, technisch affineri Chinese VPNs installiert und chöi uniigschränkt ufs Internet zuegriffe. Für aui angere (Zitige, Radio und Fernseh iigschlosse) herrsche strikti Zensurrichtlinie wo vor Kommunistische Partei greglet wärde — so wie aus angere i däm Land.

Bis e Teu vor Gseuschaft, süsch chunsch i Chefi

8. Chinese kopiere aues

Das Vorurteil chöimer bestätige. Bsungers bi Jack Wolfskin wird gärn abgluegt und ds Logo sowie d’Marke chöme i de wiudischte Variatione vor: Jake Wolfclaw, Jak Wolsky, Tiger Wibravery oder sogar Dawei Wolfczua trage Maa u Frou vo Wäut. Chinderschoggi wird zu BinQu Chocolate oder Jianyi und us Red Bull gits Duo Bull. Ou süsch chunnt eim im Supermarkt z’einte oder angere Produkt merkwürdig bekannt vor. Aber schliesslech lehrt me dürs Nachemache am beste, oder… si d’Chinese äch zersch gsi? Me weisses nid.

Ou für jedi Web-Platform oder Applikation wo ir westleche Wäut populär isch oder viu Gäud bringt, gits es chinesisches Pendant. Anstatt Google gits Baidu, anstatt Whatsapp gits WeChat, anstatt Facebook gits Renren und anstatt Twitter gits Weibo. Amazon und eBay si zwar nid gsperrt in China, Alibaba het aber dr grösst Marktateil.

Unkopierbar ⇎ bisnär.ch

9. Chinese reise nur in Gruppe

Chinese reise ungloublech gärn. Das machesi vor auem im eigete Land und in gfüehrte Gruppene. Dr Tourismus isch es riise Gschäft und das wirft e Schatte über vili schöni Orte. Die grösste Attraktione wärde nach staatlech standartisierte Kriterie vo A bis AAAAA bewärtet. D’Kriterie dräiesech um Sicherheit, Zuegänglechkeit, Suberkeit aber ou Kapazität. Wär e Top Spot wot sii, brucht es guets Rating, brucht e guet usbouti Aalag, brucht Parkplätz und Gländer und Dräichrüz und Souvenirständ und Warnschiuder und Putzchräft und e McDonalds. Aui Gfahre und Hindernis wärde usem Wäg gruumt, we öppis zweni spektakulär isch wird nachebesseret — im Name vom Bsuecher und sim Erläbnis.

Wisswasser Terrasse us Betong, wiu die richtige äue zwit obe am Hoger si

Üs het das mängisch gstört, aber mängisch heimer o nur dr Chopf gschüttlet. Gnosse heimer die sogenannte AAAAA Scenic Areas fasch immer (hmhmm, Simatai) und sehenswärt sisi uf jede Fau. Derbii heimer glehrt, weme de Masse wott uswiiche, muessme dr steinig Wäg wähle und nid mitem Bus oder Gondeli ueche fahre — und de Masse uswiiche isch öppis wome definitiv wott. Hie no einisch d’Terra Cotta Chrieger zum Vergliich.

In China cha sogar e Toilette e Uszeichnig für ihri Verdienschte übercho.

Was nume Doppu-A?

10. Die hei ja nur so Hudle a de Füess

Chinesischi Reisendi ir Schwiz si oft nid mitem richtige Schuewärch usgrüstet. Dür intensivi Nacheforschige si mir zu fougendem Schluss cho: Wär in China geit ga Wandere, cha i de Stögelischue ga. Ufe chlinscht Hoger aber ou uf regurächti Bärge ueche füehre teereti Pfade, Stägene u Seilbähndli. Du muesch diner tüüre Prada-Schue kei Sekunde ar dräckige Natur ussetze. Weme ds Wandere nume so kennt, ischs kes Wunger dass aui i de Turnschue ufs Jungfroujoch gö.

Ussert me isch natürlech mit Playboy usgrüstet

11. Chinese ässe aues

Während uf teune Nachtmärkt Skorpione, Frösche und Chäfer am Spiess, Ängerlinge und angeri Würm aabotte wärde, eklesech aui Chinese wo mir troffe hei vor serigne Sache. Die Ständ si vorauem e Touristeattraktion. Weme im Restaurant hingäge nid ufpasst, chas guet sii dass eim jenschti Innereie, Söi- und Hüehnerfüess, grunnigs Bluet oder sogar es Hirni uftischet wärde. Löblech, dass z’ganze Tier verwärtet wird, aber weme sich das nid gwahnet isch schlücktsechs veiechli hert.

Zum Glück hets i teune Menus Biudli

12. Schiuderwahn

Was eim in China sofort uffaut, si die unzählige Warnschiuder, Markierige und Durchsage zur eigete und dr Sicherheit vo de Mitmönsche. Bi jeder Routräppe ir U-Bahn louft ir Ändlosschlouffe es Bängli wo eim seit, me söu sech häbe. Jedi Stäge het mindischtens zwöi Schiuder wo vor de Stufe warne und wenn es Gländer mau sötti fähle, hets Markierige wo säge dass ds Gländer itze fäut. We öpper e Uszeichnig für öppis überchunnt, hänkter aus ersts es riesigs Schiud use wo das aune mitteilt. U mängisch hets ou eifach nur luschtegi Übersetzige. Hie es paar Bispiu:

Für z’Glück vo dir und dire Familie, acht uf d’Sicherheit und tue nid überträtte (ar Gränze zu Nordkorea)

E Wanderwäg ohni Gländer? Undänkbar!

Kes Passiere vo Passagiere i dere Passage

Uf jede Notfau vorbereitet

Waud wie ne Liebi, Füür uf jede

Bitte nid wösche! (Beschwärde a fougendi Nummere)

Was bi -25°C darfme nid schwümme?

Dr Rücksichtslosist cha mit Brandverhüetig ruhig gsteut wärde

Achtung, lebändigi Schine!

Ja… fische mit dr Ruete isch verbote

We ds Wasser gfrürt ischs de würk souglatt

Die beschti Touriste-Information vor Wäut: Mir verspräche dass aui diner Problem zu dire Zfrideheit glöst wärde

E Million Lüt im Füür si nid viu, e dür Nachlässigkeit provozierti Katastrophe

Hie wird ghornet

Links, rächts… beides? Beides isch guet.

Nimm d’Ross-Integrität vom Alkohol und Tabak Monodoly

Grüen liebsch du ig är, Waudbrand uf jede

Steu di hinger ar Schlange a. Möög nid desume. Zwing keiner Usländer drzue, mit dir es Gruppephoto z’mache. Pfipf nid i d’Richtig vo angerne. Fördere gsungi Ungerhautig, säg nei zu Abergloube, Erotik, Glücksspiu und Gift. Amen.

Lade für frittierti Shanghai-Brötli gfüut mit Monopol

1. Wed mitem Kundeservice unzfriede bisch unds rätschisch, bechunsch es Souvenir
2. Wed e Vorschlag zur verbesserig vor Sicherheit machsch, bechunsch es Souvenir
3. Üser Nothäufer erreiche di im Notfau innerhaub vo 15 Minute (gäbe dir aber keis Souvenir)
4. Wed e Schwindler oder gfäuschti War rätschisch, bechunsch es Souvenir

Rütschegi Strass, Frohlocke verbote (steit äxtra no uf koreanisch)

Für 25kg hinger uf ds chline Tischli bim Zugsitz z’bringe muesch scho veiechli blöd tue

D’Yang Yu, Mittuschuel-Abgängere, 34i, läbt mit ihrne Eutere in Kunming, suecht e 34-38 jährige, ledige Ma mit stabilem Iikomme. Bi Interesse lüt bitte ihrer Mueter ah. (Hüratsaazeige are Muur imne Park in Kunming, d’Müetere si oft näbe dranne ghocket und hei passendi Individue diräkt aagsproche)