Guilin

Für d’Reis uf Guilin hei mir üs wieder mau gwagt, e Bus z’nä. Die Erläbnis ir Mongolei hei üs bis i Süde vo China verfougt und d’Nacht vorhär hei mir vo traditionell Mongolischer Musig ire Ändlosschlouffe tröimt. Die füfstündigi Fahrt hetsech aber im Verglich zure Schlafdeprivations-Folter in Guantanamo Bay aagfüeut wie ne Nacht imne Happy-Bett.

Guilin ligt am Lijiang (Li-Fluss), wosech mitts dür d’Stadt schlänglet. Ds Stadtbiud isch gspickt mit runde, grüen überwachsne Hügle, d’Alleene si gsüümt vo Paume und Banyan Böim (zu dene chömemer de speter no). Ds Klima isch zwar agnähmer, für d’Jagge abzzie hets aber glich nid glängt.

Di wundersame Reise vom Linyu Li

Über Couchsurfing simer ufe Linyu gstosse. Mir si für zwe Nächt bi ihm ungercho und hei so eine vo de ussergwöhnlechste Mönsche bis itze troffe.

Dr Linyu isch 17i, geit no i d’Schueu, redt perfekt Änglisch und läbt siteme Jahr i sire eigete Wohnig. Wiu är dert es Zimmer frei het, steut är das sit Januar 2017 regumässig Reisende zur Verfüegig. I däm Jahr hei über 130 Lüt us auer Wäut bi ihm gschlafe und dr Linyu isch e Art Couchsurfing-Superstar worde.

So gärn wie dr Linyu vo frömde Lüt bsuecht wird, so gärn geit är ga Reise. Scho mit 15i het är die erste Usflüg uf Hong Kong und Vietnam ungerno. De Eutere heter aber nie öppis vo sine Aabentür verzeut. Är isch de aube fürne Tag zwe bimne Kolleg gsi oder het eifach gschwänzt. Siner Eutere sige sehr sträng, heter üs verzeut. Si schaffe beidi für d’Regierig und sini Mueter lütet ihm au Tag zwöi mau a. Mit 16i hetersech chli witer wäg trout und isch uf Äthiopie gfloge — wiu dr Flug günstig sig gsi. Gluegt, was das überhoupt fürnes Land isch, heter ersch när. Drufabe het är si Flug umbuechet und isch nach emne eitägige Ufenthaut in Äthiopie i Libanon gfloge. Ou hie heter ersch när gluegt was das überhoupt fürnes Land isch und wieso dä Flug äch ou so günstig isch gsi.

Womer bi ihm si gsi, heter grad die ersti Wäutreis planet: Vo China uf Saudi-Arabie, für nes paar Stung uf London, e Tag uf New York, drü Täg uf Peru und de über Paris wider hei uf China — i sibe Täg. Am Tag vo sire Rückkehr faht ds Chinesische Nöijahr ah; DAS Familiefest in China. Wiu dr Rückflug genau am Tag vom Chinesische Nöijahr, woner bi sine Eutere muess verbringe, ligt, darfer kei einzige Flug verpasse — süsch chunnter z’spät hei. Ar Mueter wöuers dasmau scho säge, aber ersch wener am Flughafe stöng.

PS: Im Moment isch dr Linyu wider uf Reise in Europa und fürnes Hochzit vomne Couchsurfer schnäu uf Indie.

Vo Blüemli und Vögeli

Guilin beherbärgt dr berüehmt berüchtigt “Bird and Flower Market”. Berüehmt für die grossi Vieufaut a Ware und berüchtigt für d’Ware säuber. Im Reisefüehrer wird dr Markt aus Flohmarkt deklariert und tatsächlech überchunntme i de vo Elektronik über Husratsware bis Pflanze und äbe, Tier, aues.

Blüemli

Wär sech im westleche Teil vom Märit dür die änge Gässli a de viele Lüt, Vase, Töpf und Rollerfahrer verbischlänglet, fingtsech imne wahre Dschungu vo Bonsai-Böim und exotische Pflanze wider. Inmitte vo Bärglandschafte mit Miniatür-Gwächs, Wasserfäu und farbige Figürli vergisstme für ne Moment dassme ire lute, gschäftige Stadt isch.

Aber dr Märit het ou e östleche Teil…

…und dä befindet sich uf dr dunkle Site vor Macht. Witerläse uf eigeti Gfahr.

Vögeli und angeri beduurenswärti Kreature

Scho grad bim Iigang wird eim ds Härz broche und jede Stand wo no isch cho, isch no uf de Schärbe umetramplet. Im erste Huus si vier Hundezwinger mit grössere Hüng wo permanänt am bäue si, vor usse - um Chöiffer aazlocke - si Wäupe imne chline Chefi und bim Iigang hocke zwe Chatze imne Chäfig näb de bäuende Hüng. Die Chatze hei dr truurigst Blick gha wo mir je bi Chatze hei gseh.

Im Zentrum vom Vogumarkt wird ds Hundegebäu vomne konstante, ohrebetöibende Gezwitscher abglöst. Hie türmesech Chefige vougstopft mit exotische Arte wie Kanarievögu oder Papageie, aber ou heimischi Arte wie Spatze oder Meiseli. Wird e Vogu gchouft, wirder so unsanft ines Netzli gstopft wie ne Tanneboum churz vor Wiehnachte ufem Bundesplatz in Bärn.

Hamster und Chüngeli stöh ou zum Verchouf.

Zum Schluss chunntme no zu de Fische und Amphibie. Hie tummle sech Goldfische in nach grössi sortierte Becki, Schiudchröt, die chlinschte früsch gschlüpft, graage überenang düre und im einte Becki hets sogar Grotteulme gha.

Dä Marktbsuech het üs veiechli beeländet. De Händler hie schiint völlig egau ds sii, wies ihrer War geit. Wed bim sortiere e Goldfisch näbs Becki schiessisch de gheischne haut i Ghüder, we dr Spatz bim verpacke e Flügu bricht isch umso besser, de chaner ömu nümm dervo und dass d’Wäupe dr ganz Tag ufem Gitter vom Chefi müesse stah het no gar niemmer aus Problem erkannt. Hie wärde würklech Ware ghandlet, nid läbegi Tier.