— 07.09.2018 —

Am Ufer vom Li

Nach lange, chaute Wintertage in Nord- und Zentralchina simer am 20. Dezämber 2017 definitiv im langersehnte Süde aacho. Z’erste mau sit dr Olkhon Insle ufem Baikalsee, heimer d’Umgäbigserkundig im T-Shirt absolviert. Xingping (兴坪) isch nur e Chatzesprung vo Guilin entfernt und ou übere Li Fluss erreichbar, für die Bootstour simer aber zweni flüssig gsi u hei dr Zug gno. Im Landkreis Yangshuo (阳朔) gläge, bietet Xingping eini vo de iidrücklechste Karstgstei-Landschafte nachem Avatar-Nationalpark in Zhangjiajie.

Karschtfeuse in Xingping
D’Ussicht vom Bird’s View Pavillion

Bluescht­fahrt dür d’Orange­plantage

Im Hostel mitem klingende Name “Dä aut Ort” hetme chönne Roller miete. Ökobewusst wie mindischtens d’Heufti vo üser Zwöier-Reisegruppe isch, heimernis fürne Elektroroller entschide. Heiter simer losgsummet, immer am Li Fluss na dr Sunne entgäge.

Zwöi ufem Elektroroller

Es isch nid lang gange du ischnis dä Li Fluss aber scho i d’Queri cho. E munzigi Fähri isch aber zur Steu gsi und het Passagiere und ihri Gfährt uf die angeri Site bracht.

Munzegi Fähri ufem Li Fluss

Derna isch d’Strass vom Fluss wäg i d’Orangeplantage ueche u prompt hets aagsteut — ds Elektromotörli het nur ei Person möge hogeruf schleipfe. D’Orange si grad früsch gsprützt worde, ds Schnouse heimer du la sii und si gleitig wider z’dürab.

E Frou sprützt Orangeböim

Wider am Li Fluss unger isch d’Fahrt dür Gmüesfäuder witergange, bismernis i äbe grad dene Gmüesfäuder verfahre hei.
Ds Läbe hie im Süde isch eifacher aus im Norde, grossi Maschine gsehtme niene, d’Fäuder wärde vor auem vo Hang bearbeitet.

E Frou treit zwe Chörb uf de Schultere und es Ching am Rügge
Szenerie am Li Fluss
Eine am Salat pflanze
Es Späckgsteu

Ds Stedtli Yangshuo heimer füre Moment no links la lige und si zum 1400 Jahr aute Banyan Boum gfahre. Banyan Böim zeichnesech dür ihri bemerkenswärti Usbreitigs-Strategie us. Vo jedem Ast lösi dünni Wurzle la hange. We die bis zum Bode chöme, fö si ah z’wachse und biudesech, mit gnue Geduld, zu witere Stämm us.

Banyan Boum
Da gsehtme vor luter Boum e Waud

Ds Gebiet um Yangshuo isch gspickt mit Sehenswürdigkeite, drum simer aus nächschts zum Moonhill gschnaaget, dr Blick immer uf dr Ladeaazeig vor Rollerbatterie. Die isch nämlech mittlerwile bös ir zwöite Heufti gsi. “Mir chöine ja de in Yangshuo lade, bevor mer wider heizue gö”, heimer dänkt und heinis a Ufstieg gmacht. Nachere knappe Stung, weme ersch d’Heufti vom Hügu erklomme het, chunntme zure chline Ussichtsplatform. Dr Wäg ufe Gipfu isch miteme Warnschiud verseh: “Zuetritt verbotte - wäg dr Sicherheit”.

Moonhill vo unge

Mir hätte üs ja itz nie getrout das Schiud z’ignoriere und eifach witer z’louffe. Wiu mir aber dr Peter und d’Camee in Guilin hei troffe, wiu die e schlächte Iifluss uf üs hei gha und wiu die so drufgängerisch si gsi und das Schiud ignoriert hei — hei mir üs gseit “was die chöi, chöi mir no lang”, und hei ds Schiud ignoriert. Trotz am Smog, wo d’Ussicht chli verdorbe het, chame erahne wie fantastisch die Landschaft muess sii wes mau schön isch.

D'Ussicht vom Moonhill
D'Steffi ufere Stange ufem Moonhill
D'Ussicht Richtig Norde vom Moonhill
Dä Stunt isch vo Profis düregfüert worde, nid deheime nachemache

Nach dere riskante Bärgbestigig heimernis ufe Heiwäg gmacht. Theoretisch wäres no öppe 30 Kilometer für wider zrugg uf Xingping gsi. Mit 15km/h, füre Akku z’schone, simer vo aune wo e Motorroller gmietet hei, hämisch grinsend überhout worde. Füre Roller si aber scho die drü Kilometer uf Yangshuo z’viu gsi, iigangs Houptstrass ischer no 5km/h gfahre, 100 Meter witer obe ischer volländs erschöpft gsi.

E chli ratlos heimer dr Roller ar Houptstrass na gschobe, bismer bimne Handyverchöiffer e angere Roller hei gseh, wo am lade isch gsi. Dert heimer zuechegha und versuecht üsi Situation z’erkläre. Ou wesi nid aus verstange hei, heimer dert üse Roller dörfe iistecke.

Roller lade in Yangshuo

Es isch scho langsam fiister worde und ab auem Warte heimer mau nachegluegt, wie lang dases äch geit sone Roller vou z’lade. Mit grosser Ernüchterig heimer müesse feststeue, dasses ungfär 12 Stung geit, biser vou isch. Nach zwene Stung lade, öppe am achti am Aabe, heimer gfunge es sig gnue. Entweder längts für hei oder mir Stosse de Chrüppu.

Mit schwachem Liecht simer ufe Highway iiboge, geng müglechscht nach am Rand, damit mir nid vo de verbiraasende Trucks übere Huufe gfahre wärde. We e Chrüzig isch cho, heimer aube vorem Wägwiiser gwartet, bis es angers Outo isch verbigfahre – ohni aaständigi Schiinwärfer heimer nüt chönne läse, so stockdunku ischs gsi.

Gäg die 9e, nachere liechte Stigig het d’Aazeig wider aafa blinke. Mit letschter Chraft heimer wie Motte uf ds Liecht vore Beiz zuegha, ir Hoffnig dass si üs e chli Strom hei. D’Beiz isch scho zue gsi, aber d’Familie isch no vorusse ghöcklet und het früsch pflückti Manderindli gässe. Mir hei dörfe zuechehöckle, Manderindli probiere und üse Roller iistecke. Verstange heimer üs nid, mir hei grad chönne säge dassmer us dr Schwiz sige (“Ruishi”, 瑞士) und dassmer ihne viumaus danke (“Schieschie”, 谢谢).

Nachere witere Stung lade simer die letschte 8 Kilometer aagange. Mittlerwile hets keiner Outo meh uf dr Strass gha und mir si eher uf guet Glück gfahre – immer chli links haute. Es isch ou langsam richtig chaut worde, immerhin isch churz vor Wiehnachte gsi. Uf z’mau si nis d’Gebäude aber bekannt vorcho: dür irgend es Wunder heimers uf Xingping gschafft. Zrugg im Hostel heimer scho gmeint mir müesse nachezahle, aber die heinis nur usglachet. Nachere warme Duschi heimer ou d’Finger wider chönne bewege und heinis gschwore, nie meh e Elektroroller z’miete.

Dasses in Yangshuo Turbo-Ladestatione git, heimer ersch viu speter erfahre.