Welcome Busan Guesthouse

Eigentlech heimer nach dr Geoje Insle uf Japan wöue. Mir hei aber gli einisch realisiert, dass Japan relativ tüür isch und me nid eifach so planlos cha is Land vor rote Sunne lauere und nid derbii verlumpe. Mir hei auso e Ort bruucht wo mir in Rueh chli chöi ohni schlächts Gwüsse dinne hocke. Da ischs üs grad gläge cho, dass ds Welcome Busan Guesthouse (웰컴부산) nach zwe Wuche ändlech mau uf üsi Aafrag reagiert het, wo mir ihne über Workaway gschickt hei. Si würde no zwöi Freiwilligi bruuche, wo für ei, zwe Wuche chöme gäge Chost und Logie cho Zimmer putze.

Bousteu: Chuchi

Üses Zimmer isch im vierte Stock, z’oberst obe im Huus gsi — dert wo ou d’Chuchi isch. Wo mir die z’erschte Mau hei gseh, hets üs fasch hingere gsträut. Rund ume Herd hets Ölfäuder gha wo jede Scheich hätte niidisch gmacht, sämtlechi Gwürz und Sossene si chläbrig gsi, im Abwäschtrog isch dräckigs Gschirr gläge, dr Chüeuschrank het e eigeti Biosphäre entwicklet und d’Brösmeli im und ume Toaster hätte e ganze Park Spatze tagelang chönne ernähre. U das isch nume e Teu vom Vorname vo dere Misere womer hei vorgfunge.

We d’Steffi so öppis gseht, chriblets ihre i de Fingerspitze und si het kei ruhegi Minute bis die Chuchi blitzblank isch. D’Ju, üsi Chefin, isch no so froh gsi, dass sich öpper dere Misere aanimmt und het tatchräftig mitghulfe die Chuchi wider uf Vordermann z’bringe.

Üser Dekorationsideene si äbefaus uf offeti Ohre gstosse und mir hei dä abstossend Ruum ohni grosses Budget chli fründlecher chönne mache.

I de Zimmer

D’Gescht vom Welcome Busan Hotel si überwiegend asiatischi Kampf-Shopperinne gsi, wo sich übers Wuchenänd dür die zahlriiche, längwilige Super-Malls gwüeut hei. E sehr aagnähmi Art Gescht… wär nid Früehlig gsi. Aus wäre si Golden-Retriever, hei die guete Froue ihres Winterfäu abgstreift und ihrer dicke länge schwarze Haar sorgfäutig im ganze Ruum verströit. Mir si dere Herusforderig dank modernster Technik und maximaler Motivation gwachse gsi.

Im Stägehuus

Eines Tages isch im Stägehuus Merkwürdigs zue und här gange. Aber luegit säuber:

Offebar bout me hie d’Stägehüser wasserdicht, so dass me se ohni problem cha fluete und usewäsche. Vilech ischs ou nid ganz wasserdicht, aber gfluetet heimer einewäg.

Die drü Wuche in Busan hei üs chli Luft verschafft um Japan z’plane. Wiu Japan ds tüürschte Land isch wo mir uf dere Reis si gsi, isch e gueti Vorbereitig ds あ und お. Bevor mir auso a Hafe übere gloffe si und die Fähri uf Japan gno hei, hei mir e Masterplan usgarbeitet gha.