Wiudi Ross

Wo d’Steffi vo wiude Ross ir Mongolei ghört het, ischsi nümme z’haute gsi. Am beste chame die im Khustai Nationalpark ga luege, dä isch öppe 2 Stung vo Ulan Bator entfernt. E Tour i de Park isch aber veiechli tüür gsi, drum het d’Steffi prompt uf ne autbewährti Methode zrugg griffe: Facebook Reisegruppene.

Tatsächlech het d’Elaine, e Chinesin wo ir Mongolei ungerrichtet, uf Steffis Post reagiert. Mir hei e Gruppe biudet und d’Elaine het no e Kollegin iiglade… u die Kollegin het no zwöi Verwandti iiglade… u drü Kollege vo dene si o no mitcho. Am Schluss simer zwöuf Lüt us füf Länder gsi und hei grad e Minibus charteret für de Usflug.

Im Park

Die Przewalski Ross (Prschewas?) si rächt schüüch, es si ou die letschte wiude Ross wo nie vom Mönsch si domestiziert worde. Wiu dr Park rächt gross isch hetme kei Garantie, die Ross de ou würklech z’gseh. So isch du ou die erschti Ufregig nachem härezoome schnäu wider abklunge:

Mir hei aber nid ufgä und tatsächlech isch üsi Usduur belohnt worde. Zwe drei Kilometer witer im Park inne isch e Gruppe Ross am Grase gsi. Wosi üs hei gmerkt, si si zum Glück nid grad dervoprescht, aber so ganz ghüür ischsne du doch nid gsi und si heisech langsam hingere Hügu verzoge. Das Ross, wome irgendwie z’Gfüeuh het öppis stimmi nid, het e Sänder ume Haus. Im Nationalpark wärde verschiednigi Forschigsprogramm düregfüehrt, drzue ghört natürlech o d’Beobachtig vo de Przewalski Ross.

Przewalski Ross erkenntme a ihrem einzigartige Usseh

Im Khustai Nationalpark hets e bemerkenswärti Viufaut a Tier. Nid nume Ross u Hirsche, sondern ou Lüchs, Wöuf, Murmeli, Gazäue, Wiudchatze und über 120 Voguarte. D’Steffi aus Hobby-Ornithologin isch sich sicher, dass uf fougende Fotos e Steiadler z’gseh isch.

Sehr ziemlich sicher e Steiadler

E chline Usblick

Üs hei diversi Läserkommentär erreicht, wo korrekt feststeue dass mir bereits angerhaub Mönet in China si (Stand 01.01.2018), d’Gschichte aber nur bis i d’Mongolei gö. Drum verzeue mir öich ir nächschte Gschicht wie mir die Mongolisch-Chinesischi Gränze überquert hei.

Bis när.