Shangri-La

Vo Baishuitai ischs de ou nümm so wit uf Shangri-La. Erneut heimer üs ines chlises Bussli quetscht und hei die Fahrt über fantastischi Passstrassene richtig Norde fortgsetzt. Ds einzige Problem bi dere Sach, dr Phippu isch gar nid guet zwäg gsi: Chopfweh, vercheutet und liechte Schwindu.

Z’Paradies wome fasch verlore hätt

Shangri-La (oder o Xianggelila bzw. 香格里拉市 bzw. སེམས་ཀྱི་ཉི་ཟླ་གྲོང་ཁྱེར།) isch d’Houptstadt vor Outonome Tibetische Präfektur Diqing u heisst eigentlech nume wägeme Buech e so. U zwar het dr Schriftsteller James Hilton i sim Buech Lost Horizon vo dem paradiesische Tal Shangri-La gschribe u da het di Chinesischi Regierig churzerhand beschlosse, dass das no e guete Name wär für Tourischte aazzieh u so het Zhongdian (中甸县) 2001 e angere Name übercho. Dr Vouständigkeit hauber, erwähnemer iz hie gliich no, dass di Tibetischi Bevölkerig nach wie vor dr traditionell Name Gyalthang (རྒྱལ་ཐང) verwendet. Inwiefern de ganz Ufwand e positive Iifluss uf di touristischi Entwicklig gha het, chöimer nid abschliessend säge. Wasmer chöi säge isch, dass z’Füür, wo 2014 d’Heufti vor berüehmte Autstadt vor Shangri-La verbrönnt het, sicher nid het ghuufe. Di grossi Tragik a dere Gschicht isch, dassi eich extra es grosses Füür-Präventionssystem hätte gha, me aber vorsorglech het z’Wasser abgsteut, damit d’Leitige nid gfriere. Ups.

D’Autstadt isch vou mit exzellentem Brönnstoff (gsi).

Glücklecherwiis isch nid aus vo dem Inferno verschlunge worde u so chame z’riesige, guudige Gebetsrad no hüt i sire ursprüngleche Pracht bestuune u dräie. Es isch bis 2012 z’gröschte Gebetsrad vor Wäut gsi, när het China sini Superlative mitere nöie Superlative toppt u so isch iz z’Gebetsrad ir Qinghai Provinz z’gröschte u das in Shangri-La haut nume no z’zwöitgröschte. Scho chli fiis, steit doch Shangri-La scho süsch chli uf dr Looser-Site.

Drfür het Shangri-La no dr 100 Hüehner Tempu mit Hüehner u Güggle u fantastischer Ussicht uf z’Tau und di umgebende Bärge.

U während d’Steffi zum erschte Mau uf dere Reis, alleini het uf Erkundigstuur müesse (i schwöre, es het nid so gfägt), isch dr Phippu im Hostel im Bett gläge. So:

Iischnuufe, usschnuufe

Es hetsech du glii eis usegsteut, dass di Grippesymptom keni Grippesymptom si gsi, sondern die vo Höhechrankheit. Da drmit empfählemer öich, die fougeriiche Fehler nid z’mache, söttiternech eis i dere oder ere ähnleche Situation befinge:

1. Nid uf 2’500 m.ü.M. d’Wiisswasserterrasse ueche seckle, wüuderse no im Sunneliecht weit fötele (o we dr Grund isch, dassder am nächschte Tag scho wider drvo juflet).
2. Am nächschte Tag nid scho wider drvo jufle, sondern afe no chli dert si unds ruehig näh.
3. Scho gar nid ine Ort witerjufle wo no höcher, nämlech uf 3’160 m.ü.M. ligt.
4. Eifach gar nid jufle am beschte u de sött das guet cho.

Wüu weder die fougeriiche Fehler machit, chönntiter när so usgseh¹

oder die Fehler füehre drzue, dassech dr Körper o nach chli Warte u Usrueihe u Literewiis Ingwertee trinke nid a d’Höchi gwöhnt. De blibt öich när no genau ei Lösig für das Problem: wider abe ga. U wennder eigentlech e tolli Route über di tibetische Hochplateaus planet heit für uf Chengdu z’reise, schiisst die Lösig ziemli aa. Es bedütet nämlech, lang Bus fahre und när lang Nachtzug fahre - u wasmer vo Nachtzüg in China haute wüsster ja mittlerwile… (siehe “Zhangjiajie”). Aber je nu, öppis angers ischnis nid übrig blibe.

Wi das isch use cho und öbsech dr Phippu vo dere Überdosis Höchi erhout het, erfahriter ir nächschte Gschicht.

¹ Z’Ufträtte vo serigne Symptom isch nid abschliessend wüsseschaftlech beleit.