Seoul Hiking & Nature Group

Vom Sebastian us Finnland, wo in Südkorea lebt wüuer Finnland längwilig fingt (es heig nume Böim), heimer vor Seoul Hiking & Nature Group verno. E Gruppe wo regumässig Wanderige und angeri Usflüg organisiert und me sech eifach cha aaschliesse, weme Luscht het.

Womer ihri Leitsätz uf Facebook hei gseh, simer hin und weg gsi:

♣ Nature always as it is but always feels different whenever we go! experience! Be intuitive, Be simple, happy, strong, open mind to nature!

Natur immer wis isch aber es füeuhtsech angers aa, wenn immer mir gö! Erfahrig! Bis intuitiv, bis simpu, glücklech, starch, offe gägenüber dr Natur!

♣ Away from hundreds of thousands traffic, advertisements, people, cars, too much little and small things that you are worrying about. Away from the TV selling the horrible news, selling the immoral stories, giving trauma, telling the same things hundreds of times.

Wägg vo hunderte vo tuusige Verchehr, Wärbige, Lüt, Outos, z’viu chliini und chliini Sache wo du dir drüber Sorge machsch.
Wägg vom Fernseh wo horribli News und unmoralischi Storys verchouft, wo Trauma verursache . U hundert mau z’Gliiche verzeut.

U o bezüglech Sicherheit, heisi überzügendi Argument z’lifere:

♣ Hiking is much safer than staying home and the possibility of kicking doors or the legs of sofa and get hurt yourself! since 2008, we don’t any any serious incidents other than some people were talking too much while hiking and hit his head on the rock but was okay.

Wandere isch viu sicherer aus daheime bliibe, mitr Müglechkeit Türe oder Sofa-Bei iizschutte undsech drbi z’verletze! Sit 2008 heimer absolut keni schlimmere Zwüschefäu bis uf Lüt wo dr Chopf am Feus hei aagschlage, wüusi z’viu hei gschnuret, aber das isch okey.

You will be shockingly happier than ever in Korea~!

Da gömer!

Dobongsan

Seoul isch e super Stadt, d’Bärge si hie so nach, dassme Wanderige vor UBahn-Station us cha starte. So heimernis am Sunntigmorge, am 25. Februar 2018, bir Hoeryon Station troffe. Es isch nid schwierig gsi, üser Wanderkumpane z’finge, bi au dene Usländer. Üse Guide isch e jungi Koreanerin, d’Mary, gsi. Süsch mit derbi: dr John us Amerika wo aus Änglischlehrer schaffet (wär hätts dänkt), dr Jiri, e luschtige Tschech wo mit sire Fründin hie läbt (si isch e Managerin, er isch Huusmaa u ab u zue machter no chli öppis für Greenpeace), dr Francois us dr Nechi vo Québec wo are englisch-koreanisch Übersetzigsapp tüfftlet u sis Läbe mit Aktie ar Börse finanziert (irgendwie) u no paar angeri Iiheimischi u nid Iiheimischi.

Es fautnis grad sofort uf, dass d’Koreaner chli angers tigge aus d’Chinese, wes um z’Wandere geit. Di unbefeschtigte Wäge fühlesech für üs aa wines Stückli Heimat. Entsprächend usgrüschtet si di Iiheimische - uf de iischige Passage sisi üs mit ihrne Spikes a de Schueh klar überlege u wes zum Picknicke ufem Gipfu chunnt, steit o usser Frag, wer z’Renne macht. Di hei aus womesech cha vorsteue u aus womesech nid cha vorsteue anne und mit drbi - top Schueh u Wanderusrüschtig, Wanderstöck, Chüssi zum druf hocke und e Dechi für z’Picknick oder d’Variante Tischli u Stüeuh, e transparente Kubus aus Windschutz? und zum Ässe säubstverständlech Stäbli (spinnsch vo Hang!) u Täuerli u Becherli u Thermosfläsche u no viu meh. U z’absolut Wichtigschte bi au dem isch - Soju oder Makgeolli - dr Gipfuwii bzw. Schnaps. Überhoupt heimer z’Gfüeuh gha, dass sig die Motivation, dr Gipfu z’erreiche. Di si förmlech obsi gseklet. U bi au dem Züg isches nid witer verwunderlech, dass ihri Ruckseck fürne Tageswanderig nahezue gliich gross si wi üsi Reiseruckseck. Nei danke.

Mir hei leider ke Gipfuschnaps derbi gha, aber di tolli Ussicht het de Verluschtschmerz veiechli möge lindere.

Let’s march in March!

Am 1. März 1919 si d’Lüt in Korea uf d’Strass u hei gäge di japanischi Bsetzig demonstriert. De Tag het schlussendlich mit viune Verletzte, Verhaftete u sogar Tote gändet. U trotz de tragische Verluschte uf koreanischer Site, isch de Tag dr Aafang vor Koreanische Unabhängigkeitsbewegig gsi. Hüt isch dr 1. März dr Nationalfiirtag vo Südkorea.

Di zwöiti Wanderig het üs drum am 1. März entlang vo dr sogenannte Fortress, ar aute Stadtmuur vo Seoul, bis zum ehemalige Gfängnis für Rebelle gfüehrt. Dennzumau het di Muur em Schutz vor Stadt dient, hüt erstrecktsech Seoul wit über d’Gränze vor Muur us. Ei Teil vor Muur isch militärisches Gebiet, dert muessme dr Pass vorwiise, überchunnt e Badge ume Haus ghänkt u wird druf higwise, dassme z’Einte oder Angere nid darf fötele.

DMZ

Wüumer eifach nid gnue vom Kim-Land chöi übercho, isch dr letscht Usflug womer mit dr Seoul Hiking & Nature Group hei ungerno, a d’Gränze zu Nordkorea gange. Besser gseit zur DeMilitarisierte Zone zwüsche dene beide Länder wo mau eis si gsi.

E spezielle Gast

Was de Usflug so spezieu het gmacht, isch e Frou im rot-schwarze Karohemmli gsi, wonis het begleitet. Hüt läbt si in Südkorea u füehrt es viu schlechters Läbe aus si vorher het gfüehrt, wosi no e höchere Poste ir Regierig het gha. U zwar ir Regierig vo Nordkorea. Dert hetme ihre eines Tages öppis wöue aahäiche u de hetsi genau drü Müglechkeite gha: fliehe, öffentlech exekutiert wärde oder ime Gfängnis lande womese höchschtwahrschiinlech hätt gfouteret und missbruucht. Si het sich für d’Flucht entschide. Zwe vo ihrne vier Brüetsche heire ghuufe, di hetme aber leider z’China verwütscht u zrügg uf Nordkorea bracht, wosi si exekutiert worde. Si säuber het in Nordkorea e Maa und e Tochter. Si gloubt dra, dassne guet geit. Sit ihrer Flucht het si aber kei Müglechkeit gha, mit ihrer Familie z’kommuniziere.

Es hetnis veiechli mitgno, e Mönsch vor eim z’ha, wo irgendwenn i sim Läbe vor dr Entscheidig isch gstange, sis Läbe oder müglecherwiis d’Läbe vo sire Familie z’opfere…

E Brügg für d’Freiheit

Mir si de zäme mit angerne Touris ime Car desume gfahre worde u hei verschiednigi Stops entlang vo dere DMZ gha.

Über di sogenannti “Freiheitsbrügg” hetme nam Chrieg Gfangnegi hin u her gfuget. U natürlech hetme o hie wider chönne fernrohre, was z’Einte oder Angere het zum Vorschiin bracht.

Hoffnig und Vertrouensbruch

Zwöi angeri Statione vo dere Tour chönnte ungerschiedlecher nid si. Ds einte isch dr letscht Bahnhof uf dr Linie Seoul - Pyeongyang, es Symbol vor Hoffnig uf Wiedervereinigung. Dinne hets e Schauter wome de mau cha Bigliets uf Pyeongyang chouffe, es het Wägwiiser zu de Gleis und d’Gleis si bereits beschriftet. Aber Personezüg fahre no keiner (nur Güeter).

Am angere Ort chame e Tunnu go besichtige, wo 1976 vo Südkorea entdeckt isch worde. Dä Tunnu füehrt vo Nordkorea unger dr DMZ düre und hätt chönne für ne Invasion brucht wärde, hätt Südkorea nid e Abfang-Tunnu bout und ds Loch mit viu Stahl und Betong gstopft. Bis hütt si vier derartegi Tunnle entdeckt worde.

Mit dr Kertu us Estland unger dr DMZ

Die beide Orte zeige dütlech wie kompliziert d’Beziehig zwüsche dene beide Länder isch. Vore düre wird vo Wiedervereinigung gschwärmt, wie das söu funktioniere isch aber völlig unklar.