Hiroshima - Osaka eifach

Es isch dr 25. April 2018, Tagwach 7:00. Nudusuppe us dr Box mit 2 Eier zum Zmorge. Mitem Zug bis uf Tomo. Dert ufe Parkplatz. 10:00 simer dert. Stöh dasmau vor dr Toilette, jede u jedi geit a üs verbi. Mir stöh 2 Schtung - hüt harzets. Chliini Parking Area. Vieli Arbeiter im Kombi u Verträtter im Aazug.

Hitch No. 1

• Nach 2 Schtung chunnt e Arbeiter ufnis zue u seit er chönnis öppe 20 km mitnäh, zure grössere Servicestation. Taketani isch si Name. Er isch geng chli am Englisch lehre, brücht aber chli meh practice. Er het Fründe z’Amerika, z’England u z’Ouschtralie im Faceboo-Messenger. Dert schribt er mitne u üebt so Englisch. Er fragtnis öbmer verhüratet sige. Mir gänim Phils Nummere u mache es Föteli. Er schenktnis no Japanischi Riiscrackers. Sehr lieb.

Hitch No. 2

• Zwöi ufgregti Froue nähmenis mit zur Fukuyama Servicestation. D’Fahrerin isch 50i u mir finge si gseht jung us. Das Kompliment fröitse, mir chönnte ihri Ching si, seitsi gröölend. D’Kommumikation mit paar Wort Englisch und Übersetzer. Geng wemer öppis säge gröölesi luthaus u es gitne fasch öppis. Haha. 7 Mönet ungerwegs und üse Plan vo Hokkaido machtse niidisch u beiidruckt. Si frage am Schluss fürnes Foto, mir wei o eis. Wosi z’bluemige Kitsch-Härz bim Parkplatz gseh, isch klar wo das Foto gmacht wird. Di nächschti Passantin wird aaquatscht u muessnis je mit 2ne Handys u üsere Kamera fötele.

Hitch No. 3

• 2 jungi Japanerinne nähnis bis zur Kibi Servicestation ir Nechi vo Okoyama mit. Beidi chöi weni Englisch, via Übersetzer geit guet. Mir überchöme McDonalds Pommes aabote. Si grööle wi di vorherige, si nume öppe 30 Jahr jünger. Wo die wo fahrt Pommes u Burger währendem Fahre ist u eihändig stürend, zwüsche Laschtwäge düre blochet, schwitzemer scho bau chli Bluet.

Hitch No. 4

• Mir träffe tatsächlech ufene angere Hitchhiker. E Japaner, e Künschtler wo 7 Jahr in New York gläbt het und iz in Tokyo wohnt. Er isch geng so ungerwegs. Hüt vo ir Nechi vo Hiroshima bis uf Kobe. Er zeigtnis dr Apparat wome gratis Grüentee, gröschtete Riistee oder chauts u heisses Wasser cha use la. Das heigs i jeder grössere Servicestation. Er fingt o hüt sigs chli gnietig. Woner ufem WC isch, hautet für üs es Grosi miteme Lädersitzmercedes aa. Er chunnt zrügg u hiuft nätterwiis hurti übersetze. Mir biete ihm aa, er söu mit ihre ga, er sig schliesslech vor üs da gsi. Er seit, sicher nid. De verabschiedemernis dankend u gö los mit dere Dame. Mir hei nid lang gwartet. So guet. Womer z’Schwige bräche steutsech use, dassi veiechli Englisch cha. Si isch 71! u het ihre Enkel bsuecht. Si tüengi gern Outofahre hetsi gmeint. Si isch gfahre wi dr Blitz aber totau sicher, veiechli beiidruckend. Letscht Jahr hetsi mit ihrer Schwoscht für 10 Täg d’Schwiz bereist. Jungfroujoch u 2 Täg Zermatt hetsi no gwüsst. Zum fahre hetsi so Giigesonatene oder was glost. Si hetnis de schlussendlech ime Ussebezirk vo Osaka bime Bahnhof use gla (top Service bis zur letschte Sekunde), ganzi 2 Schtung simer mit dr Ito ‘Hagla?’ ungerwegs gsi.

• Uff, das hitchhike macht müed!