Harbin

Kokosnuss-Paume amne wisse Strand, e fruchtige Drink mit Schirmli ir Hang, sanft ruuschendi Wäue um d’Füess und e liecht sauzegi Meeresbriise im Gsicht si ds vorherrschende Thema vo üsne Tagtröim uf dr Zugfahrt i Norde vo China gsi. D’Destination chönnt gägeteiliger nid sii: Meterdick gfrorni Flüss, iischchaute Biisluft, Chappe, Händsche und Daunejagge über sibe Schichte Thermo-Chleidig. Ds Bigliet isch aber aus angere aus e Fäuchouf gsi — Winter, mir chöme!

Sibe Schichte obe, drü Schichte unger

D’Iisch-Houptstadt

Bire Durchschnitsstemperatur vo -16° Celsius, geits in Harbin (哈尔滨, in Manchu), ar Houptstadt vor Heilongjiang Provinz (黑龙江, “Fluss vom schwarze Drache”) vorauem um Schnee und Iisch. Es git drü grossi Usstellige mit Schnee- und Iischskulpture, die grössti dervo isch e ganzi Stadt us Iisch.

Für dasses so scheisse chaut isch dert, si regurächt viu Lüt verusse. Uf dr Strass wärde, vo de hartgsottnischte Verchöiffer womer je begägnet hei, heissi Marroni und Souvenirs verchouft. Zum Bewiis wie chaut dasses isch gsi, hie e Glace-Stang:

Vorauem dr meterdick gfrornig Fluss lockt Gross u Chlin a d’Cheuti. Die Grosse drifte mit Chäre ufem Fluss desume, die chlinere lösech vo Huskis oder Schneemobil la über die spieguglatti Iischschicht zieh oder brätsche mit Peitsche uf Zwirble ii — bi witem die bizzarschti Aktivität.

Ice Lantern Garden

Dür nes Portau us Iisch toucht me i nes Meer vo Liechter. Dr Schnee unger de Füess knarzet mit jedem Schritt ufem Pfad wosech düre Zhaolin Garte (兆麟公园) schlänglet. D’Skulpture wo dr pfad süüme, lüchte i schrille Neon-Farbe, es Schiudli informiert über d’Idee und übere Künstler säuber. Us ganz Asie si si uf Harbin greist, für die ungfähr 2-3m³ grosse Iischblöck mit Chöttisaagine, Pickle, Sagine und Meissle z’forme.

Snow Sculpture Exhibition

Wär sichs wagt, die ungloublech länge 1000 Meter übere Fluss zur Sunne-Insle (Taiyang Dao, 太阳岛) z’louffe, fingt sich ir wundersame Wäut vor Schneeskulptur-Usstellig wider. Näbscht viune chlinere Wärk präsentiert sich d’Usstellig mit es paarne riesige Skulpture vor chinesische Site. Us üs unbekannte Gründ het aber der Schnee nid ganz glängt und me het churzerhand improvisiert.

E usdehnte Spaziergang düre Skulpture-Park isch es Paradies für Schneemaa-Enthusiaste. Künstler, wider vorauem us Asie, setze hie d’Standards für gformte Schnee uf nes ganz nöis Level. Bi teilne Figure hetme gseh, dass d’Kante nach 1-2 Monet afe chli gschmolze si. Trotzdem isch dr Detailriichtum absolut überwäutigend gsi. Kei einzigi Figur het aber e Rüeblinase, e Zylinder, es glismets Haustuech oder Cholechnöpf gha, was scho chli enttüscht het.

Üse klar Favorit:

Harbin Ice City

E ganzi Stadt us Iisch. Die Vorstellig isch dr Houptgrund für die längi Reis i Norde gsi und ou d’Houptattraktion am Harbin Ice Festival. Ds Iisch füre Bou vor Stadt chunnt diräkt vom Zhongua Fluss. Während guet 20 Täg schnide 300 Arbeiter us dr Region 180’000 Kubikmeter Iisch usem Fluss. Am Morge am 3 föh si ah. Während si die 400-700 kg schwäre Blöck schnide und mit Gabustapler uf Lastwage verlade, müesse si sech ständig bewege, damit si nid erfriere. Es isch e strängi und gfährlechi Arbeit (d’Schnider trage Schwümmweste und si mit Seili gsicheret), trotz aune Sicherheitsmassnahme chunnts aber immer wider vor, dass eine dri gheit. D’Arbeit fürs Festival isch aber e wichtigi Iikommensquelle, während düre Winter d’Farme zuegfrore si. (Meh über d’Arbeiter fürs Festival und es paar schöni Biuder)

Bild: Kevin Frayer/Getty Images

Die herte Cheibe si bis zu 13 Stung ar Cheuti usse, mir hautes ou mit Kameuwullesocke us dr Mongolei und Wärmepads nur knapp e Stung us. Zum Glück chame überau hurti chli iche a d’Wermi.

Was bi Tag scho Iidruck macht, chunnt ersch bi Nacht so richtig zur Gäutig.

Ei Teil vor Stadt het sich, wie bereits dr Latärne-Garte, um Iisch-Skulpture dräit. Me het aber gmerkt, dass hie d’Superstars am Wärch si gsi. Details wie d’Arme vom Seemonster, d’Kapuzene vo de Seelüt, die filigrane Flügle vo de Meiseli oder die huuchdünni Schibe vom Astronauteheum hei eim mit offetem Muu la stuune bis dr Söifer gfrore isch.

Ou hie heimer e Favorit:

Wau

Einzig dr überraschend Biitrag vo Ägypte isch chli us dr Reihe tanzt. Aber mir wei i däm Fau es Oug zuedrücke.

“Abstract”