Gränze überträtte

Bevor me irgendwelchi Gränze cha überträtte, bruchtme zersch es Visum. Ganz bsungers giut das für d’Gränze nach China, da wird nämlech ziemlech viu verlangt und gnau häregluegt. Wo mir Änds Septämber ir Mongolei si aacho, hei mir grad am erste Tag wöue sone Fötzu ga hole. E Dütsche wo 10 Minute nach üs im Hostel isch aacho het üs aber e grobe Strich dür d’Rächnig gmacht. Er het nämlech verzeut är chömi direkt vor Chinesische Botschaft. Dert heigme ihn prompt wider vor d’Tür gsteut und ihm versicheret: es gäbi keiner Visas für Usländer für z’mingscht e Monet — Super!

Super!

Mir heinis du gseit mir warte mau bis Ändi Monet u versueches de eifach mau. So simer am 28. Oktober du einisch bi dene Chinese ga verbi luege. Im Büro si nume zauriichi Sicherheitsbeamti u d’Schalterdame gsi. Trotz de schrege Blicke het üs niemmer usegheit u mir si ds Frölein mau ga frage wie das itz äbe sigi. Die het sträng üser Päss ungersuecht, nis es Formular usghändiget und aafa ufzeue wasmer aus bruche für das Visum. Zmitts im Satz hetsi gstoppt und üs iidringlech as Härz gleit, ihrer Instruktione z’notiere. Mir hei salutiert u ds Blofi zückt. Das hei mir ufgschribe:

• Flugtickets für ine und use (da hei mir schone Zieukonflikt gha - mir möchte ja müglechscht nid flüge)
• Hotelbuechige für jedi einzelni Nacht in China
• E viersitige Visumsaatrag wome aus Biografie chönnt bruche
• Passfotos und Kopie vom Pass
• Dr Phippu het no e offizielli Erklärig handschriftlech müesse a Konsular richte, wo drinn begründet wird wieso är si aut Pass, wo sit 2 Jahr abgloffe isch, nid derbi het

Üse Plan isch e Rundreis dür China mitemne Abstächer uf Hongkong, wo ja nid zu China ghört, gsi. Für dä Fau gits gäbigerwiis es Zwöimau-Ine-Visum (Double Entry) wo für 3 Mönet güutig isch. Mir hei auso mau uf Booking.com, e Plattform für Hotelbuechige, aagfange Hotels z’finge wo: 1. Kei Voruszahlig wei und 2. Gratis stornierbar si. Die meiste storniere drum sämtlechi Buechige, sobaud si in China si und luege de spöntu. Wär cha scho 3 Mönet präzis im Vorus bueche (ussert Karin & Julien, Huet ab!). Mir hei eifach für jedi grösseri Stadt uf dr Charte 2 Wuche buechet bises drü Mönet het gä.

Huehuehuehuee

D’Flugtickets si chli kniffliger gsi. Flüge isch für üs kei Option gsi drum hei mir ufne Reisetrick zruggriffe, womer vo angerne Reisende glehrt hei: es git Dienste wo dir es Ticket bueche und das nachere Wuche wider storniere. Ds Ticket isch legitim während dr Aatrag prüeft wird und wird när, ohni dassmes muess zahle, wider glöscht.

Eine vo dene Dienste isch dr sehr vertrouenswürdig Travelvisaguru us Indie. Dert chame mit eim chatte und für $20 Fake-Flüg bueche. Mir hei je zwe Flüg buechet: ine und use. D’Flüg füre Abstecher uf Hongkong heimer iigspart, wüusnis het tüecht, dass bruuchis nid für z’Visum. Bim Iireiche vom Aatrag ischnis üsi Knausrigkeit aber zum Verhängnis worde. Ds Frölein am Schauter het du partout nid wöue chopfe, dass mir China für zwe Wuche wei uf Hongkong verlah u de wider zrugg ine wette. Nach einigem Hin- u Här het si üs gseit si chönn das Visum eifach vom Häreflugs- bis zum Useflugsdatum ussteue. Für üs het das gheisse dassmer die zwe Wuche statt in Hongkong eifach zuesätzlech in China hei — schlussendlich 104 Täg, aber nur einisch ine. Mir hei dänkt “nid liire” u hei brav merci gseit.

Ds Frölein isch nid so drus cho

Tschüss Chinggis

Bevor mir üs us dr Mongolei verabschidet hei, hets hurti veiechli e Huufe Schnee häregheit. Für üs isch das ds definitive Zeiche gsi zum ga. E Wuche nach däm mir dr Aatrag iigreicht hei, simer uf dr Botschaft aatanzt u hei üse Pass mitem Chläber dinne chönne entgäge nä. Niemmer het irgendwelchi blöde Frage und ou keiner Lüt vor d’Türe gsteut.

Hoi Mao

Ussert mitem Flugzüg, chame d’Gränze vor Mongolei zu China uf zwe Wäge überquere: mitem Zug oder im Jeep. Hoch zu Ross geit nid, da si d’Chinese äue no chli brönnt.

“Wäuh dr Wäg wo die besseri Gschicht verspricht.” — Öpper schlaus irgendwenn

Jeep tönt guet, heimernis gseit und dr Zug nur bis a d’Gränze buechet. Ir Gränzstadt Zamin Uud, womer vo Ulan Bator us mitem Nachtzug erreicht hei, si mir vo diversne Jeep-Fahrer wärmstens empfange worde. Jede het wöue sichersteue, dass mir ou jah i sim Jeep übere fahre. Es het 7 Franke gchoschtet und mir si zumne Prius gfüehrt worde. Nid grad was üs vorgschwäbt isch, aber ou hie het ds nöie Zitauter Iizug ghaute - hei mir üs gseit. Womer im Outo si ghocket, isch dr Fahrer uf z’mau verschwunde.

He! Chum zrugg

Nachere haub Stung isch e Frou hingers Stüürad ghocket und isch mit üs us dr Stadt use gfahre, ufne riesige Parkplatz. Dert heisi du die Jeeps parkiert gha - über 200 Stück fiinsüberlech iigreiht. D’Jeeps si aber aui läär gsi, wiu die richtigi Kolonne isch diräkt usserhaub vom Parkplatz gstange. Ei Charre am angere anne, schön ire Einerreihe, am Warte für über d’Gränze. Üsi Fahrerin het üs bedütet uszstige u mir si ihre ar Blächkolonne na hingernachezottlet. Irgendwo heimer ichegha u dert isch tatsächlech üse ursprünglech Fahrer zmitts i dere Kolonne gstange. Üs hets du taget, dass är, sobauder üs aagworbe het gha, miteme angere Outo afe isch ga aastah. Die Art Effizienz ir Mongolei het üs überrascht.

Ufem Wäg zum Mongolische Zoll heimer ds Outo no mit angerne Gränzreisende gfüut. Die hei das Spiili offerbar scho es paarmau düregmacht und üs düre Prozess gjagt - si hei tatsächlech e rächte Stress gha für über die Gränze z’cho. Das isch üs aber entgäge cho, da sie üs mit diversne Formalitäte si behiuflech gsi. Zum Bispiu hei mir sämtlechi Mongolischi Tugrik vorab i Chinesischi Yuan umtuuscht und am Mongolische Zoll hetme für irgendöppis no 5000 Tugrik müesse bläche. Super!!

Super!!

Bim Chinesische Zoll simer du scho fasch chli närvös worde. Es isch e riesegi Haue gsi, ir Mitti hei d’Zöllner i irne erhöhte Hüsli und mit irne hochmoderne outomatische Schranke dr Gränzgedanke verdütlecht. Hinger de Zöllner ar Tili isch e Armee vo Sicherheitskamaras ghanget, üs ischs vorcho aus hätt jedi Kamera no e Kamera wo d’Kamera fiumet, dass ömu de ja niemmer öppis dranne figuretlet. Dr Computer wo währendem ganze Prozess mit eim redt (ar Steu vom Zöllner wo nume luegt), het üs schliesslech inegla, aber ersch nach däm me dr Service vom Zollbeamte miteme grinsende Smiley bewärtet het - aus würdsech öpper getroue ds Gränni-Smiley z’drücke.

Getrousch du di?

U da simer gsi, i dem China. Dr erst Iidruck isch nid grad dr Wahnsinn gsi, (bis ufe Rägeboge) haut eifach z’Zollgebäude vo hinge und e Parkplatz. Kener Tuktuks, ke Riis, kener Lüchtreklame, kes Chaos uf dr Strass, kener Fäuschige, ke Muur, kes Süess-Suur Poulet, kener Mönschemasse, kener Iitrittsgebühre und kei einzige Tämpu.

Das chunnt de aus i de fougende Gschichte, versproche.