D’Armee vom Qin Shi Huang und d’Herde vom Han Jingdi

Teu heis vilech scho errat… ehm googlet, i dere Gschicht geits um d’Terracotta Armee, eini vo de Houptattraktione weme so a China dänkt — die heimer sicher nid chönne usselah. So simer uf Xi’an böret und si dert bir Viviane ir “Urban Mansion” ungercho. Das isch e Park vou Hochhüser für die ghobneri Schicht, am Iigang vor Security überwacht und inne vom Putzpersonal uf Hochglanz poliert. Im schigge Apartment im 13te Stock heimer zum erste Mau sit langem wider chli chönne huse.

Chrieger us gchochter Ärde

Die lebensgrosse Chrieger wache sit 2000 Jahr übere erscht Herrscher vo China. Es wird gseit, er heig gloubt, dass sini Regentschaft übere Tod us geit. Di Armee vo Chrieger isch 1974 vo Buure entdeckt worde, wo uf ihrem Fäud hei wöue e Brunne grabe u drbi uf Schärbi gstosse si. I dene 44 Jahr isch einiges gange. D’Buure hei müesse are usdehnte Aalag mit Souvenirshops, Fast-Food Schüppe, Bluemegärte und natürlech de riesige Usgrabigs- und Usstelligshauene wiiche. I de Souvenirshops wärde Wiudtierfähli feilbotte, am Iigang wirdme vore Armee Touristefüehrer belageret wo eim wei wiismache, ohni ihrer Dienste sige die Chrieger längwilig. Weme de a eim vo dene 30 Schauter es Billiet gchouft het wirdme vo guet 50 Sicherheitschräft dürlüchtet, bevorme ufs überwachte Gländ glangt. E Hochsicherheitstrakt isch e Dräck dergäge. Aus das heimer übernis la ergah und si gottefroh gsi, ir Näbesaison hie z’sii.

Haue 3

Insgesamt hets drü Usgrabigshauene, 1, 2 und 3. Konterintuitiv heimer üse Rundgang ir Haue 3 aagfange, ir chlinschte vo aune. Ir Haue 3 vermuetetme ds Offiziersquartier wäg de viune höchrangige Chrieger wome dert het gfunge. Mit lääre Häng stö dert um die 30 Figure und 4 Ross im Grabe unge — d’Waffe und dr Rosswage si mit dr Zit zu Stoub zerfaue.

Nid aui Offiziere stöh stramm uf ihrem Poschte. Dert wo d’Usgrabige no nid abgschlosse si, würke die stouze Figure eher wie die truurige Überräste vomne Massaker.

Haue 2

Die Haue isch scho bedütend grösser gsi aus die ersti womer gseh hei. Hie si d’Usgrabige no fasch im Aafangsstadium und die meiste Chammere si no deckt. Drunger verbärge sech d’Kavallerie im hingere u d’Pfileboge- u Armbruschtschütze im vordere Teu. Um di 1300 Ross u Soudate. I dene wo offegleit si, herrscht wie scho ir dritte Haue heiters Chaos. Körperteili lige wiud verströit am Bode ume und hie und da luegt es Pferdefüdle zur Wang us. Die Wäng si nid öppe so bout worde, sondern vo de Archäologe no nid abtreit. Vorhär isch die ganzi Grabstette unger dere Lehmschicht vergrabe gsi.

I dere Haue hetme ou es paar Exemplar chli necher chönne betrachte. Bi dene Chrieger gsehtme guet wie einzigartig d’Frisure, d’Gsichter und sogar d’Chopfbedeckige si.

Haue 1

Mit grosse Erwartige simer i die grossi Haue marschiert. Me gseht doch immer die Biuder mit unzählig viune Chrieger wo stramm in Reih und Glied stöh - bereit ihrem Kaiser bis i aui Ewigkeit z’diene.

Vo dene 6000 Soudate wome hie z’finge gloubt, si aber zur Zit nume die vordere Reihe fähig, uf ihrne eigete zwöi Lehmbei z’stah. Dr Räst vo de Chrieger ligt entweder no zersplitteret unger 2 Meter Ärdriich oder wird im hingere Teil vor Haue 1 wie nes Puzzle zämegflickt. Üs hets bau düecht das sig dr spannender Teil und es hetnis sehr a Westworld erinneret - e Serie wosi läbensächti Roboter imne Western-Vergnüegigspark hei.

Uf dr rächte Site vor Haue, am Schluss vo üsem Rundgang, simer no uf waschächti Archäologe gstosse, wo in müehsamer Gäggeli-Büez Schüfeli um Schüfeli Ärde abgchräblet hei.

Usstelligshaue

Imne vierte Gebäude hets no diversi Sache usgsteut gha, wo süsch no so si fürecho. Replikas vo Waffene, Haufter u angerne Grätschafte sowie zwe Kutschene mit je vier Ross us Bronze.

Bi offizielle Staatsbsüech gsehtme guet, wie d’Sympathie verteilt si. So het zum Bispiu dr Vladimir goldegi Spiuzügrössli übercho, während d’Angela miteme Maubuech isch vertröstet worde.

D’Herde vom Kaiser Jingdi

Während d’Terracotta Chrieger östlech vo Xi’an lige, isch am Jingdi sini Herde eher nördlech. Ufere Flächi vo insgesamt 7.000m² stöh zwe riesegi Grabhügle — eine füre Kaiser (32m höch) u dr anger für d’Kaiserin. Um die Grabhügle hets strahleförmigi Grabchammere, vou mit chline Figürli vo Mönsche und vorauem Tier. Hie isch no viu weniger usgrabe aus bi de Chrieger. D’Usstellig beschränktsech uf zwe Grabchammer usserhaub vom Houpt-Grabhügu — bi däm heisi no nid mau aagfange. Jedi Mönschefigur het beweglechi Houzarme gha u isch ine Siderobe ghüut gsi. Das isch mittlerwile verrottet u übrig si e Huufe armlosi, nackti Tatsache. Für üs isch völlig unvorsteubar wie viu dere Figure hie no begrabe lige - dr Lonely Planet seit meh aus 50’000 - gschwige wie lang dasses het duuret bis die si gmacht gsi.

Dr Han Jingdi het siner Lüt mit weiser Hang regiert und vorauem ufs Wirtschaftswachstum gsetzt. Bis uf ei Ufstang isch sini Regierigszit aus fridlech und florierend i d’Gschichtsbüecher iigange. Wiuer vor auem ou d’Landwirtschaft gförderet het, hetme ihm uf sire letschte Reis Arbeiter und Nutztier mitgä.