Beijing

De wärme itz auso hie, i dere absolut riesige Stadt (18-24 Mio Iiwohner), wome im Winter nid häre söu. Wägem Smog; mir hei üs scho ne ABC-Schutzusrüstig zuegleit — und es het partout ke Smog. Äue heinis die zwe Giele am fautsche Ort usegla, aber e Blick uf d’Charte het zeigt dass mir zmitts i de Hutongs vo Peking si. Dr Houptgrund für di drastischi Verbesserig i dem Jahr isch d’Umstellig vo Chole uf Biogas fürs Heize. Schiins. Witeri Iiflüss si Produktionsstops vo starch verschmutzende Industrie und günstigs Wätter. Suber isch d’Luft aber no lang nid.

Hutongs

Wo dr Peter üs z’erste Mau zu sire Wohnig gfüehrt hei, heimer gmeint mir wärde für immer und ewig i däm Labyrinth us Gäng, Husegge, Durchgäng u Strässli gfange blibe, so kompliziert isch üs dr Wäg ir Dunkuheit vorcho. Bi Liecht het das Ganze scho chli angers usgseh.

Di Sammlig vo gedrungene Hüttene, schmale Lädeli, verzworglete Gasse und viu chinesischem Charme lade zum planlose Umeschlendere ii. Überau hanget chli Wösch ar Kablerei wo jede Schwizer Elektriker i Schockzuestang würd versetze. D’Kanalisation isch so schlächt, dass d’Hüser meistens gar keiner Toilettene hei, me muess uf die Öffentleche. Die si so öffentlech, dasses zwüsche de Löcher nid mau Trennwäng het. Bsungers aata heis üs aber ou i de Hutongs d’Details, i däm Fau Türene:

Die nümm so verbotni Stadt

Näbscht em Smog isch die Verbotni Stadt wahrschiinlech die Sehenswürdigkeit, wome mit Beijing verbingt. Dert gömer, heimer dänkt und hei festgsteut, dasses nur no verbote isch, weme ohni Ticket ine wott. Auerdings si mir nid die einzige gsi wo a däm Tag z’gliche dänkt hei.

Di Stadt isch i diversi Beriiche ufteilt und mit ihrne fasch 1000 Gebäude relativ witlöifig. Di Bezirke und Strukture hei extrem klingendi Näme wi: Tor vom Himmlische Friede, Palast vor irdene Rueh, Tor vor höchschte Harmonie oder Palast vor himmlische Reinheit. Mir hei e Audioguide gmietet, aber dä het entweder schlächt funktioniert oder isch nid grad für viu gsi: är het houptsächlech verzeut, wo überau irgend e Kaiser irgendwelchi Meetings het gha (Spoiler: überau).

Um d’Kasier im aute China ranke unzähligi Legände und Mythene. So hetme gseit dass d’Macht vom Kaiser derewä gross isch gsi, dass är Elefante het chönne befähle eso abzlige, dass si ihrer Vorderbei imne unmügleche Winku gäg vore biege.

Kalligraphie und Töpferei

Zwe vo de Usstellige heisech um sehr traditionell chinesischi Kunstforme dräit: Schön Schribe u schön Töpfere.

Dr Schatz vom Kaiser

Jede Palast brucht e aaständigi Schatzchammere, da heisech ou d’Chinese nid la lumpe. E Teu vom Schatz isch wägem Chrieg gäg Japan uf Taipei grettet worde, dr anger Teu isch ir Verbotne Stadt hinger Panzerglas. Natürlech muessme für nume die Usstellig no zuesätzlech Iitritt zahle.

9 Dragon Screen

Das isch nid öppe dr nöi Mega-Chino Komplex mit Liinwäng aagordnet in nüün Dimensione, sondern e freistehendi Wang mit nüün Drache us Keramik. Vo dene Wäng gits insgesamt drü originali in ganz China und wies dr Zuefau het wöue, heimer aui drü gseh. Eini in Datong, eine ir Verbotne Stadt und eini in Pingyao.

Dä ir Verbotne Stadt het aber no e bsungeri Gschicht. Bim Bou hets dr Uftraggäber relativ pressant gha, d’Künstler hei auso die Chachle ir Wärchstatt gfertigt und vor Ort montiert. Bir Montage isch aber eim vo de Arbeiter sone Chachle a Bode gheit u dä Keramik isch i tuusig Stück gsplitteret. D’Zit het nümm glängt für ne nöii Chachle z’brönne u wes wär uscho, wär dr Arbeiter brutau bestraft worde. I sire Verzwiiflig heter auso es Stück Houz gno und die Chachle nachegschnitzt und lackiert. Ufgfloge isch dä Pfusch ersch viu speter, wo z’Houz isch verwitteret und d’Lackierig abbletteret isch. Darum isch itz dr Buch vom einte Drache us Houz.